Telur líkur á miklum efnahagslegum óstöðugleika

Framkvæmdastjóri SVÞ og segir að fjárhagstjón vegna breytingu á reglum Seðlabanka Íslands um tryggingar og sparnað erlendra tryggingafélaga verði gífurlegt. Hann segir að þarna séu hagsmunir tugþúsunda Íslendinga í húfi og telur ólíklegt að erlendir aðilar muni koma til með að opna reikninga hér á landi. Fari svo, þurfi að finna lausn á hvað gert verði við þá samninga.

Seðlabanki Íslands telur að gjaldeyrisviðskipti þriggja íslenskra tryggingamiðlara sem selja þjónustu erlendra tryggingafélaga hérlendis brjóti í bága við lög um gjaldeyrismál. Því þurfa um þrjátíu þúsund Íslendingar, sem safnað hafa sparnaði erlendis, að hætta því og færa sparnað sinn í krónur.  Seðlabankinn telur að um fjörutíu milljarðar króna hafi farið úr landi í erlendum gjaldmiðli á árunum 2012-2014 vegna þessara sparnaðarleiða.

„Það er allavega erfitt að sjá að þau erlendu félög sem eiga hlut í málinu opni reikninga hér og þá verða menn, og Seðlabankinn, að svara þeirri spurningu, hvernig ætla þau að meðhöndla þá samninga sem þarna eru undir ef þau erlendu félög sem þarna eiga hlut í máli neiti að opna reikninga í íslenskum krónum,“ segir Andrés Magnússon, framkvæmdastjóri Samtaka verslunar og þjónustu (SVÞ).

Andrés segir tilkynninguna um breyttar reglur hafa komið honum í opna skjöldu og hafa aðrir hagsmunaaðilar sömu sögu að segja. „Seðlabankastjóri segir þetta hafa verið unnið í samráði við hagsmunaaðila. Hvorki við eða aðrir vissum af þessu fyrr en þessi makalausa tilkynning birtist,“ segir Andrés.

Mun stuðla að efnahagslegum óstöðugleika

Þorsteinn Víglundsson, framkvæmdastjóri Samtaka atvinnulífsins, segir að ákvörðun Seðlabanka Íslands að loka á sparnað almennings í útlöndum endurspegli þann vanda sem fylgir gjaldeyrishöfum. Hann segir að nauðsynlegt sé að afnema höftin til að koma í veg fyrir efnahagslegan óstöðugleika.

„Það hefur gætt ójafnræðis á milli aðila. Þarna eru erlendir lífeyrissjóðir sem geta boðið upp á annars konar þjónustu heldur en innlendir sjóðir geta gert. Hins vegar er viðfangsefnið til lengri tíma litið, hvað lífeyrissjóðina varðar, að þá er alveg nauðsynlegt að lífeyrissjóðir geti komist út til fjárfestinga. Þetta mun stuðla að verulegum efnahagslegum óstöðugleika hér á landi ef þetta fjármagn á að vera læst hér inni til langframa,“ segir Þorsteinn.