Halda stýrivöxtum óbreyttum

Peningastefnunefnd Seðlabanka Íslands hefur ákveðið að halda vöxtum bankans óbreyttum en þetta kemur fram í yfirlýsingu peningastefnunefndar.

Samkvæmt nýbirtum þjóðhagsreikningum Hagstofu Íslands virðist vöxtur innlendrar eftirspurnar hafa verið ívið meiri á fyrsta fjórðungi ársins en spáð hafði verið í maíhefti Peningamála.

Fram kemur í tilkynningunni frá Seðlabanka Íslands að hagvöxtur virðist hafa verið töluvert minni en þar var spáð sem skýrist einkum af miklum innflutningi þjónustu.

Samkvæmt Seðlabankanum hefur verðbólga verið við markmið síðustu mánuði og samkvæmt maíspá bankans er talið að svo verði fram á næsta ár þegar hún eykst vegna framleiðsluspennu.

„Verðbólguvæntingar eitt til tvö ár fram í tímann hafa lækkað að undanförnu í takt við hjöðnun verðbólgu en verðbólguvæntingar til langs tíma eru enn nokkuð yfir markmiði,“ segir í yfirlýsingu frá Seðlabankanum.

Gjaldeyrisviðskipti Seðlabankans undanfarið ár hafa stuðlað að auknum stöðugleika krónunnar og hefur bankinn keypt gjaldeyri verulega umfram það sem hann hefur selt á síðustu mánuðum og framundan er það tímabil ársins þar sem gjaldeyrisinnstreymi er jafnan tiltölulega mikið.

„Því hefur verið ákveðið að taka upp regluleg gjaldeyriskaup á ný. Umfang þeirra verður endurmetið í haust eða fyrr ef aðstæður breytast umtalsvert. Eftir sem áður mun Seðlabankinn beita óreglulegum inngripum í því skyni að draga úr sveiflum í gengi krónunnar.“

Hjöðnun verðbólgu og verðbólguvæntinga feli í sér að raunvextir bankans hafa hækkað þó nokkuð það sem af er þessu ári. Slakinn í taumhaldi peningastefnunnar er því líklega horfinn. Óvissa er um hverjir séu jafnvægisvextir Seðlabankans, en líklegt er að aukinn vöxtur innlendrar eftirspurnar á komandi misserum muni að öðru óbreyttu krefjast þess að raunvextir Seðlabankans hækki frekar.