"Þetta er stærsti fiskur sem veiðst hefur í sumar“

Dagur B. Eggertsson, nýkjörinn borgarstjóri, nældi í fyrsta laxinn þegar opnað var fyrir veiði í Elliðaánum í morgun.

„Það er víst ekki mikið af laxi í ánni. Við laumuðust aftan að þessum í Teljarstreng  Eftir smá nart í tveimur tilraunum þar sem hann hálfslapp þá sat hann á,“ sagði Dagur í hádegisfréttum Bylgjunnar.

Á heimasíðu Stangaveiðifélags Reykjavíkur kemur fram að laxinn hafi verið í smærri kantinum en hann mældist 57 cm.

„Þetta er stærsti fiskur sem veiðst hefur í sumar,“ sagði Dagur og hló. „Mér var kennt að segja að hann væri mjög fallegur.“

Gunnar og Kristján Jónassynir, kaupmenn og eigendur verslunarinnar Kjötborgar við Ásvallagötu voru kjörnir Reykvíkingar ársins. Þeir urðu frá að hverfa með með öngulinn í rassinum.

„Að sinni já. Þeir stóðu sig mjög vel og virkilega gaman að vera með þeim í morgun.“

Auk dags voru Björn Blöndal, forseti borgarráðs og forystumenn Orkuveitu Reykjavíkur viðstaddir opnunina.

Post by SVFR.