Allt útlit fyrir aukna einkaneyslu

Kortavelta einstaklinga jókst um 7,3% að raungildi í júní frá sama mánuði í fyrra samkvæmt tölum Seðlabankans um greiðslumiðlun. Þar af jókst kortavelta innanlands að raungildi um 5,6% en kortavelta erlendis um 20,6%. Greining Íslandsbanka segir að vöxturinn sé á svipuðum nótum og hann var í maí síðastliðnum og bendir allt til þess að vöxtur einkaneyslu muni mælast umtalsverður á 2. fjórðungi ársins. Að jafnaði óx kortavelta einstaklinga um 5,1% að raungildi á 2. Ársfjórðungi frá sama tíma árið áður. Þar af jókst kortavelta innanlands um 3,4% en kortavelta erlendis um 19,0%.

Greining Íslandsbanka segir að aðrar vísbendingar um neyslu heimilanna séu á sama veg. Þannig var gríðarleg fjölgun á nýskráningum bifreiða samkvæmt tölum frá Samgöngustofu, en bifreiðakaup eru stór hluti þeirrar einkaneyslu sem ekki er greidd með greiðslukortum. Einnig má nefna að Væntingavísitala Gallup (VVG) tók hressilega við sér í júní sl., og fór upp fyrir 100 stigin og jafnframt í sitt hæsta gildi frá því í febrúar 2008. Sömu sögu má segja af nýjustu ársfjórðungsmælingu stórkaupavísitölu Gallup, sem birt var samhliða VVG í júnímánuði, sem náði einnig sínu hæsta gildi frá september 2008. Þýðir það m.ö.o. að íslenskir neytendur eru líklegri til þess að ráðast í stórkaup nú en þeir hafa verið frá hruni, þ.e. að festa kaup á húsnæði eða bifreið á næstu 6 mánuðum, eða ferðast til útlanda á næstu 12 mánuðum. Í þessu sambandi má nefna að tölur Ferðamálastofu hafa sýnt mikla fjölgun í utanlandsferðum, og í raun höfðu ekki jafn margir Íslendingar haldið erlendis í einum mánuði og í júní síðastliðnum síðan fyrir hrun.

„Sé tekið mið af fyrri helming ársins þá hefur kortavelta einstaklinga aukist um 5,3% að raunvirði frá sama tímabili í fyrra. Við teljum líkt og aðrir að einkaneyslan muni vega mun þyngra í hagvexti þetta árið en hún gerði í fyrra þegar utanríkisviðskipti, þá sér í lagi gríðarlegur vöxtur ferðaþjónustunnar, drógu hagvaxtarvagninn að langmestu leyti. Ríma því tölur fyrir þróunina það sem af er ári ágætlega við spá okkar um 4,2% einkaneysluvöxt á árinu í heild, en þar gerðum ráð fyrir að eitthvað myndi hægja á vexti einkaneyslunnar eftir því sem liði á árið,“ segir í Morgunkorni Íslandsbanka.