Sjö leiðir til þess að nota matarsóda

Þeir sem lifa grænum lífstíl kannast ábyggilega vel við matarsóda og hans frábæru eiginleika. Matarsódi er neflilega ekki bara góður í bakstur heldur gagnast hann í ótrúlega margt annað. Það er til dæmis hægt að nota hann í staðinn fyrir sumar snyrtivörur til þess að forðast óæskileg eiturefni, til þess að vera umhverfisvænni og sem sparnaðarráð.

Hér höfum við tekið saman sjö leiðir til þess að nota matarsóda.

1. Til þess að hreinsa hárið.

Það er hægt að nota matarsóda til þess að hreinsa hárið af öllum þeim efnum sem hafa safnast upp í hárinu með notkun hárvara. Þvoðu hárið með 1/2 bolla af matarsóda og og heitu vatni á tveggja vikna fresti, þá losaru þig við öll aukaefni sem safnast hafa upp. Ef hárið verður of þurrt með þessari aðferð er hægt að bæta við matarsódann 1/2 bolla af eplaediki.



2. Þurrsjampó

Á þeim dögum sem ekki gefst tími til þess að fara í sturtu á morgnanna er tilvalið að skella smá matarsóda í hárið til þess að það líti betur út. Settu 1-2 matskeiðar af matarsóda í hársvörðinn, nuddaðu vel og greiddu svo restina úr hárinu.



3. Til þess að þvo andlit og fjarlægja farða.

Matarsódi er frábær til þess að þvo andlitið og ná af farða í lok dagsins. Helltu 1 matskeið í lófann ásamt nokkrum dropum af vatni og nuddaðu vel yfir allt andlitið að undanskildum augunum. Hreinsaðu vel af með vatni í lokin og þá er andlitið orðið tandurhreint.



4. Matarsóda bað

Það er fátt meira slakandi en gott bað. Helltu 1/2 bolla af matarsóda út í heitt bað og njóttu. Húðin verður endurnærð og mjúk á eftir.



5.Fótabað fyrir þreytta fætur

Blandaðu 2-3 matskeiðum af matarsóda út í fótabaðið og bættu við nokkrum dropum af lavender ilmkjarnaolíu. Dýfðu fótunum ofan í baðið og slakaðu á í 15 mínútur.



6. Til þess að gera tennurnar hvítari

Fáðu hvítar og fallegar tennur með matarsóda. Blandaðu saman 6 teskeiðum af matarsóda, 1/3 teskeið af salti og örlitlu vatni. Dýfðu tannburstanum í blönduna og burstaðu tennurnar vel og vandlega með blöndunni.



7. Andlitsmaski

Notaðu matvinnsluvél eða blandara til þess að blanda saman einum hluta af matarsóda á móti tveimur af haframjöli, nokkrum dropum af hunangi og örlitlu vatni og þá er kominn þessi fíni andlitsmaski.Berðu á andlit og hafðu á í 10-15 mínútur. Þvoðu af með volgu vatni og húðin verður silkimjúk og endurnærð á eftir.