Aukin sala matar og drykkjar

Sala á mat og drykk hefur aukist, þrátt fyrir mikið votviðri í sumar. Veltutölur verslunar í júlí, samkvæmt Rannsóknarsetri verslunarinnar, sýna enn hraðari vöxt en áður.

„Þrátt fyrir að veðurfarið í júlí hafi ekki beinlínis dregið fólk út í grillveislur var samt töluverð aukning í sölu á mat og drykk frá sama mánuði í fyrra,“ segir í tilkynningu frá Rannsóknarsetrinu.

Að raunvirði jóskt veltan um 3,7 prósent og leiðrétt fyrir vikudaga- og árstíðabundnum þáttum jókst hún um 4,1 prósent.

„Athyglisvert er að á undanförnum árum hefur dregið úr vægi á veltu í matvöru fyrir  verslunarmannahelgina í samanburði við aðrar helgar sumarsins. Matarinnkaup fyrir aðrar helgar í júlí eru svipaðar og fyrir verslunarmannahelgina.“

Sala á farsímum upp um 27,5 prósent

Þá vekur athygli að fataverslun jókst um 9,1 prósent frá sama mánuði í fyrra. „En fataverslun hefur verið í töluverðri lægð að undanförnu eins og kunnugt er. Ef til vill ræður veðrið einhverju um aukna fataverslun í júlí auk þess sem þriggja prósenta verðlækkun á fötum hefur sín áhrif.“

Einnig jókst sala á öðrum sérvörum, raftækjum og húsgögnum. Hún hefur aukist hratt. „Dæmi um þetta er að sala sérverslana með rúm jókst um 34,5% í júlí frá sama mánuði í fyrra. Á fyrstu sjö mánuðum þessa árs var sala á rúmum 15,4% meiri en sömu mánuði í fyrra.  Þá jókst sala á farsímum um 27,5% í júlí svo dæmi sé tekið.“

Velta í sölu á tölvum var 22,7 prósentum meiri í júlí, en í júlí í fyrra.