House of Fraser selt

Breska stórverslanakeðjan House of Fraser hefur verið seld fyrirtæki í eigu samstæðunnar Sanpower sem er í eigu kínverska auðmannsins Yuan Yafei en samstæðan er ein sú stærsta sem er í einkaeigu í Kína.

Söluverðið er um 480 milljónir sterlingspunda sem jafngildir um 93,3 milljörðum íslenskra króna að því er fram kemur í Fréttablaðinu í dag. Highland Group, félag í eigu þrotabúa gamla Landsbankans og Glitnis banka, átti  49 prósent í House of Fraser.

Samkvæmt upplýsingum Fréttablaðsins munu um 10 milljarðar íslenskra króna renna til þrotabús Landsbankans við söluna og fimm milljarðar til Glitnis. Félagið var áður í eigu BG Holding, dótturfélags Baugs, en íslensku bankarnir föllnu gengu þar að veðum snemma árs 2009.