Björgvin framkvæmdastjóri Viðskipta og þróunar hjá Íslandsbanka

Björgvin Ingi Ólafsson hefur verið ráðinn framkvæmdastjóri Viðskipta og þróunar hjá Íslandsbanka. Þar er um að ræða nýtt svið sem sett var á fót í samræmi við stefnuáherslur bankans, sem fram kemur í tilkynningu frá Íslandsbanka.

Undir Viðskipta og þróunarsvið heyra sölumál, viðskiptagreining, netviðskipti, þjónusta, markaðsmál og viðskiptaþróun. Þá hefur sviðið yfirumsjón með stefnu bankans og innleiðingu hennar.

Björgvin var fjármálastjóri Meniga um tíma og þar áður starfaði hann hjá ráðgjafarfyrirtækinu McKinsey & Company.

Þar að auki hefur Björgvin Ingi víðtæka reynslu af bankastarfsemi og var meðal annars starfsmaður Íslandsbanka frá 2000-2005. Hann er með MBA gráðu frá Kellogg School of Management og B.Sc. gráðu í hagfræði frá Háskóla Íslands.