Fyrirliggjandi frumvarp skref í rétta átt

„Heilt yfir telur Viðskiptaráð fyrirliggjandi frumvarp vera þýðingarmikið skref í rétta átt í skattamálum og fyrirhugaðar breytingar eru til þess fallnar að auka skilvirkni neysluskatta og styrkja grundvöll verðmætasköpunar hérlendis, “ segir í tilkynningu frá Viðskiptaráði Íslands.

Viðskiptaráð hefur skilað inn umsögn til efnahags- og viðskiptanefndar Alþingis vegna frumvarps til laga um breytingu á lögum um virðisaukaskatt og tekjuskatt og brottfall laga um vörugjöld.

Í umsögninni segir að breytingar á neyslusköttum auki kaupmátt heimila um 0,4 prósent að meðaltali og að kaupmáttaraukningin sé mest fyrir tekjulægsta fjórðung heimila, eða um 0,5 prósent. Jafnframt segir að breytingar á barnabótum auki ráðstöfunartekjur heimila um 0,1 prósent af meðaltali og aukningin sé þar mest fyrir tekjulægsta fjórðung heimila, eða um 0,6 prósent.

Þá segir að lágmarka megi óhagræði vegna breytinganna með því að flýta lítillega fyrir gildistöku niðurfellingar vörugjalda og seinka lítillega gildistöku breytinga á virðisaukaskatti. Það kæmi í veg fyrir að verslanir sitji uppi með birgðir vegna boðaðra verðlækkana í kjölfar brottfalls vörugjalda eða þurfi að breyta virðisaukaskatti um áramót þegar mikið álag er á verslunum og vörum er skilað eða skipt.