Ætlaði að drepa Dave Grohl

Meðlimur sveitarinnar Gwar hefur nú sent frá sér yfirlýsingu um að Dave Grohl hefði mögulega bjargað lífi sínu þegar að hann tileinkaði söngvarnum Oderus Urungus lag á tónleikum Foo Fighters í síðustu viku. En það var Gwar trommarinn Jizmak Da Gusha sem setti myndband á Youtube þar sem hann sagðist hafa farið á tónleikana með þeim tilgangi að drepa Dave Grohl en eftir að söngvarinn tileinkaði Gwar kollega sínum lag ákvað hann að þyrma lífi hans í bili. En Dave Grohl er mikill Gwar aðdáandi og grínaðist með það á tónleikunum að virðingin væri ekki gagnkvæm.

Söngvarinn Jake Bugg hefur nú lýst því yfir að verksmiðjuframleiddar popphljómsveitir hefðu hvorki hjarta né sál. Sagði hann það leiðinlegt að leggja sig allan fram við að semja lög á gítarinn en þegar hann kveikti á útvarpinu heyrðist bara einhver popp drulla. Þá sagði hann texta þessara laga vera lélega þar sem eingöngu væri sungið um bólfarir, að skála og twerka og bætti Jake Bugg við að það væru mikilvægari hlutir sem hægt væri að ræða um.

Matthew Bellamy hefur nú gefið aðdáendum smá innsýn í hvernig næsta Muse plata gæti hljómað en hann svaraði nokkrum spurningum aðdáenda á Twitter um helgina. Var hann meðal annars spurðu hvort að rétt væri að hann hefði sagt að gítarsólo væru ekki töff og játaði hann því en bætti við að hann væri í mótsögn við sjálfan sig á næstu plötu. Um helstu þemu næstu plötu sagði hann þau vera vistfræði, skort á samhug og þriðju heimsstyrjöldina. En Muse eru þessa dagana að vinna að næsta breiðskífu.

Að lokum minnum við á Straum í kvöld sem hefst klukkan 23:00. Í þætti kvöldsins mun Óli Dóri spila ný lög með Aphex Twin, Julian Casablancas + The Voidz, Made in Heights, Boogie Trouble, Ólöfu Arnalds og Todd Osborn.