„Gjaldeyrishöftin uppskrift að nýrri kreppu“

„Það er ekki eftir neinu að bíða,“ segir Þorsteinn Víglundsson framkvæmdastjóri Samtaka atvinnulífsins sem segir nauðsynlegt að afnema gjaldeyrishöftin strax. Sex ár í höftum sé allt of langur tími og nú sé tíminn til afnáms. Ella muni þjóðin ekki njóta sömu lífskjara og aðrar nágrannaþjóðir, tækifæri muni glatast og fólkið í landinu líða fyrir það.

„Aðstæður til afnáms eru eins hagstæðar og þær geta orðið. Efnahagslífið er í ágætu jafnvægi, verðbólga er lítil, hagvöxtur eykst á nýjan leik, afgangur er af viðskiptum við útlönd og traust í íslenska hagkerfinu fer vaxandi,“ skrifar Þorsteinn í leiðara sem birtist á vef SA.

Hann segir að SA hafi markað stefnu um að Ísland komist í hóp tíu samkeppnishæfustu þjóða heims á næstu tíu árum. Til að ná því markmiði hafi SA sett fram tíu tillögur og er afnám gjaldeyrishafta þar efst á blaði.

Rússíbanareið sem endar með kunnuglegri kollsteypu

„Bent hefur verið á að innan gjaldeyrishafta muni þrengja að fjárfestingarkostum lífeyrissjóða og að eignarhluti þeirra í íslensku efnahagslífi verði meiri en góðu hófi gegnir. Með því að binda eignir sjóðanna í fjárfestingum á Íslandi hefur verið spáð að árið 2050 muni eignir þeirra samsvara núverandi verðmæti alls atvinnulífs og íbúðarhúsnæðis landsmanna. Gjaldeyrishöftin eru uppskrift að nýrri kreppu,“ segir Þorsteinn.

„Efnahagsleg áhætta við afnám hafta er mun minni en hættan sem fylgir enn einni rússíbanareið íslensks efnahagslífs með kunnuglegri kollsteypu í lok ferðar. Öll nauðsynleg skilyrði til afnáms hafta eru uppfyllt.“

Gjaldeyrishöft um ókomna tíð?

Þorsteinn segir að ryðja þurfi úr vegi þeim hindrunum sem standa í vegi fyrir uppgjöri þrotabúa og lengingu Landsbankabréfs og ráðast að því loknu í niðurrif þeirra múra sem þegar hafa verið reistir utan um íslenskt efnahagslíf með höftum. Ákvörðun um að afnema þau ekki við núverandi aðstæður feli í raun í sér ákvörðun um að búa við gjaldeyrishöft um ókomna tíð.