Opna nýtt lúxushótel í Hafnarstræti

Icelandair Hotels mun opna nýtt lúxushótel í Hafnarstræti í miðbæ Reykjavíkur í ársbyrjun 2016.  Hótelið verður staðsett að Hafnarstræti 17-19 en fasteignin verður endurbyggð frá grunni. Það verða 70 herbergi á hótelinu. Verslun Rammagerðarinnar er nú í húsinu sem stendur við Hafnarstræti 19.

Í fréttatilkynningu frá Icelandair Groups segir að megin kostir hótelsins séu staðsetningin í miðbæ Reykjavíkur auk þess sem hægt er að hanna fasteignina frá grunni eftir þörfum hótelsins.

„Þessi viðbót ásamt Icelandair hótel Reykjavík Kultura, sem verður við Hverfisgötu, og stækkun Icelandair hótel Reykjavík Marina við Reykjavíkurhöfn er í takt við stefnu félagsins um að sækja markvisst betur borgandi farþega til landsins og leitast þannig við að auka arðsemi félagsins og ferðaþjónustunnar almennt,“ segir í tilynningunni.

Verkefnið verður unnið í samvinnu við Suðurhús, sem er eigandi fasteignarinnar og mun stýra framkvæmdum. Icelandair Hotels, sem er dótturfélag Icelandair Group, mun leigja fasteignina til 20 ára.