Sér um virkjanir og raforkusölu Orkuveitu Reykjavíkur

Orka náttúrunnar (ON) er nýtt opinbert hlutafélag í eigu Orkuveitu Reykjavíkur (OR) sem hefur tekið við rekstri virkjana og raforkusölu móðurfélagsins. Hlutafélagið var stofnað til að uppfylla ákvæði raforkulaga sem tóku gildi um síðustu áramót og skylda orkufyrirtækin til að skilja samkeppnishluta sinn frá sérleyfishlutanum. Félagið er næststærsti raforkuframleiðandi landsins, á eftir Landsvirkjun, og Páll Erland, framkvæmdastjóri ON, mun sjá um að stýra skútunni.

Með eignir upp á 130 milljarða

„Þetta er nýtt félag á raforkumarkaði sem er að koma fram undir eigin merkjum með það hlutverk að framleiða og selja raforku. Fyrirtækið byggir á traustum grunni og margra ára reynslu og er nú í samræmi við kröfur um aðskilnað orðið sjálfstætt fyrirtæki sem sinnir samkeppnisþáttum eingöngu,“ segir Páll. 

ON sér nú um rekstur jarðvarmavirkjananna á Hellisheiði og Nesjavöllum og vatnsaflsvirkjananna Andakílsárvirkjunar og Elliðaárstöðvar. Rekstur félagsins mun að sögn Páls skila um 15 milljörðum króna í tekjur á ári og það á eignir upp á 130 milljarða.

„ON er það rafmagnssölufyrirtæki sem hefur flesta viðskiptavini en um 75 þúsund heimili og fyrirtæki um allt land eru í viðskiptum hjá okkur. Svo framleiðum við um helming þess hitaveituvatns sem er notað á höfuðborgarsvæðinu,“ segir Páll. Hann undirstrikar að veituþjónusta OR, það er vatnsveita, hitaveita, fráveita og dreifing rafmagns, verður áfram rekin undir merki móðurfélagsins. 

Um sextíu manns starfa hjá ON í höfuðstöðvum OR. Félagið hefur að sögn Páls náð að lágmarka rekstrarkostnað með samnýtingu á stoðþjónustu móðurfélagsins, til dæmis með því að nota bókhalds- og tölvukerfi OR. 

„Við höfum unnið að því að þessi breyting skapi sem minnst óhagræði fyrir viðskiptavini okkar og þeir þurfa í raun ekkert að gera til þess að halda áfram að nota þjónustuna. Við ætlum til dæmis að senda áfram út orkureikninga sameiginlega með OR til að forðast aukinn innheimtukostnað.“

Langur aðdragandi

Stofnun ON átti sér langan aðdraganda og var frestað fjórum sinnum á jafn mörgum árum. Þar var helst um að kenna slæmri skuldastöðu OR.

„Samkeppnin á raforkumarkaðinum hófst í rauninni árið 2005 og á þeim tíma þurfti að aðgreina sérleyfis- og samkeppnisþættina bókhaldslega. Árið 2008 var ákveðið að gera kröfu um fyrirtækjauppskiptingu og hún hefur verið í undirbúningi í nokkur ár og tók gildi um áramótin,“ segir Páll og heldur áfram:

„Frá því að raforkumarkaðurinn opnaðist hafa viðskiptavinir okkar að stærstum hluta komið af höfuðborgarsvæðinu en í sífellt auknum mæli af öllu landinu. Stærstu einstöku viðskiptavinir okkar eru á Austurlandi og Vesturlandi og þar má nefna Síldarvinnsluna og Norðurál á Grundartanga.“

Gera upp í Bandaríkjadollurum

OR skuldar um 210 milljarða króna og hefur undanfarin ár staðið í umfangsmiklum hagræðingaraðgerðum. Tekjur nýja félagsins af raforkusölu eru að stórum hluta í dollurum, og lánin í erlendum gjaldeyri, og því er stefnt að því að ON verði gert upp í Bandaríkjadollurum. 

„Orkuveitan er búin að vera að leita leiða til að ná stöðugleika og lágmarka áhættu og þetta er ein leið til þess og ætlunin er að sækja um heimild til þess á vormánuðum,“ segir Páll.

Spurður um hvar skuldir ON enduðu við uppskiptinguna segir Páll að efnahagsreikningur félagsins sé myndaður með yfirfærslu eigna og skulda við móðurfélagið sem nemur þeim lánum sem tilheyra rekstri ON.

„Þær skuldir sem tilheyra eignum Orku náttúrunnar hvíla á henni, og hún greiðir þá móðurfélaginu.“

Næstu skref

Páll segir verkefni næstu mánaða snúast um að hasla félaginu völl á raforkumarkaði og kynningu á nýja vörumerkinu.

„Síðan ætlum við að veita viðskiptavinum okkar enn betri þjónustu og gera það með góðri viðskiptastýringu til stærri fyrirtækja og aukinni sjálfsafgreiðslu. Við höfum einnig verið að nýta samfélagsmiðlana í vaxandi mæli og það er hluti af okkar markaðsáætlunum að gera það enn frekar eftir því sem tæknin leyfir,“ segir Páll og bætir því við að fyrirtækið sé einnig að þróa öpp sem eiga að nýtast viðskiptavinum

„Markaðurinn hefur í stórum dráttum verið tiltölulega rólegur í þessari stöðnun síðustu ára en við væntum aukinnar orkunotkunar eftir því sem fólki og fyrirtækjum fjölgar. Síðan er auðvitað tækifæri í að laða að nýja stórnotendur, hvort sem þeir eru erlendir eða innlendir, en það er langhlaup sem sagan sýnir að er ekkert í hendi. Síðan bindum við væntingar við rafvæðingu samgangna sem við vonum að stækki markaðinn á næstu árum og viljum gjarnan stuðla að þeirri þróun eftir því sem hægt er,“ segir Páll.