Fær ein­hverja at­hygli út á þetta

Tómas Geir Howser Harðarson er í Gettu betur-liði Fjölbrautaskólans í Garðabæ, Morfísliði skólans og leikur líka eitt af aðalhlutverkunum í uppsetningu leikfélagsins á söngleiknum Beetlejuice. Fréttablaðinu lék forvitni á að vita hvort þessi mikla framtakssemi snapaði honum ekki mikla kvenhylli. „Maður fær kannski einhverja athygli út á þetta, en ég er nú samt frátekinn,“ segir Tómas.

„Ég tel mig vera ágætlega skipulagðan. Ég nýti allan dauðan tíma til að læra, og hef fengið mjög góðar einkunnir þrátt fyrir að hafa lítinn tíma. Í fyrra var vika þar sem ég var nýbyrjaður að æfa söngleikinn og að keppa í Gettu betur, og í Morfís, allt í sömu vikunni. Það var mesta kaosvika sem ég hef upplifað. Þetta æxlaðist þannig að á fyrsta árinu mínu var ég kominn í Gettu betur-liðið þegar ég ákvað að fara í prufurnar fyrir söngleikinn og komst inn. Á öðru árinu fór ég aftur í Gettu betur, og endaði með því að leika aðalhlutverkið í söngleiknum, og keppti líka í Morfís. Það gekk allt mjög vel. Þetta árið ætlaði ég að sleppa Gettu betur, en þegar við duttum út úr Morfís ákvað ég að slá til og vera með í Gettu betur,“ segir Tómas.

Þetta árið setur leikfélag skólans upp söngleikinn Beetlejuice. „Ég leik Ottó Finnsson, samkynhneigðan innanhússarkitekt. Það er alltaf brjálað að gera, en mér finnst það bara gaman,“ segir Tómas.

Tómas stefnir á að verða leikari. „Markmiðið hjá mér núna er að fara í leikaraprufurnar í Listaháskóla Íslands. Ég ætlaði alltaf að verða leikstjóri þangað til ég lék í uppsetningu Víðistaðaskóla á Grease í tíunda bekk. Þá fékk ég leiklistarbakteríuna og skráði mig á leiklistarbraut í FG. Þessi braut er algjör snilld og ég get eiginlega ekki hrósað henni nógu mikið. Hún er frábær undirbúningur fyrir leiklistarnám,“ fullyrðir Tómas.