Framlag á fjárlögum er 19,5 milljarðar í ár

Opinber framlög til rannsókna og þróunar á þessu ári verða samkvæmt frumvarpi til fjárlaga ársins heldur minni en í fyrra, en svipuð og árið 2012.

Í nýútkomnu riti Rannís, Vasabókinni þar sem birt er yfirlit nýjustu tölfræði um rannsóknir, þróun og nýsköpun hér á landi, má sjá að á árunum 2013 og 2014 munar 5,5 prósentum á föstu verðlagi þessa árs.

Nýjustu tölur um heildarframlag til rannsókna og þróunar hér á landi eru frá 2011, en það ár vörðu Íslendingar 42,4 milljörðum króna í málaflokkinn.

„Það samsvarar 2,6 prósentum af vergri landsframleiðslu. Stærstum hluta útgjaldanna var varið til heilbrigðismála og iðnaðar,“ segir í tilkynningu frá Rannís.

2011 var hlutur hins opinbera í framlagi til rannókna og þróunar 42 prósent. Sé gert ráð fyrir sama hlutfalli í ár má gera ráð fyrir að 46,4 milljörðum króna verði varið til rannsókna og þróunar á þessu ári.