Svalandi drykkir í steikjandi hita - UPPSKRIFTIR

Sannkallaðri bongóblíðu er spáð á landinu um helgina og því tilvalið að töfra fram svalandi og sumarlega drykki í veðurblíðunni.

Kampavíns-mojito

4-5 mintulauf

½ dl vodki

½ dl greipaldinsafi

1 msk. agavesíróp

Safi úr ½ súraldini

1 dl kampavín eða freyðivín

Setjið vodka, greipaldinsafa, agavesíróp og súraldinsafa í hátt glas. Merjið mintu í mortéli og blandið við drykkinn. Fyllið glasið með ísmolum og hellið kampavíninu saman við. Hrærið saman og berið fram. Hægt er að margfalda uppskriftina og gera heila könnu af þessum svalandi drykk. Þá er öllum hráefnunum blandað saman í könnuna nema ísnum og kampavíninu sem er bætt við í hvert glas fyrir sig.

Fengið hér.

Bláberja-„smoothie“

1 lárpera, skorin í teninga

2 bollar frosin bláber

½ bolli bláberjajógúrt eða skyr

1-2 bollar mjólk eða vatn

½ bolli ísmolar

1/8 tsk. vanilludropar eða -sykur

Agavesíróp til að gera drykkinn sætari ef vill

Blandið 1 bolla af mjólk saman við öll hin hráefnin í blandara þangað til allt er blandað vel saman. Bætið mjólk við þangað til drykkurinn er orðinn eins þykkur og þið viljið.

Fengið hér.

Jarðarberja- og kívílímonaði

4 bollar vatn

2/3 bolli ferskur sítrónusafi

½ bolli sykur

1 bolli jarðarber, skorin í bita

½ bolli kíví, án hýðis og skorið í bita

Blandið vatni, sítrónusafa og sykri vel saman í blandara. Bætið jarðarberjum og kíví saman við þangað til allt er blandað. Hægt er að sigta blönduna til að losna við ávaxtakjötið. Kælið og berið fram.

Fengið hér.