Hagnaður Faxaflóahafna eykst

Faxaflóahafnir högnuðust um tæpar 587 milljónir króna á síðasta ári samanborið við 367 milljóna hagnað árið 2012.

Tekjur fyrirtækisins jukust um 4,1 prósent milli ára og námu 2,8 milljörðum króna, 247,1 milljón umfram áætlun. Rekstrargjöld voru 2,2 milljarðar, nánast óbreytt á milli ára, og um 40 milljónum undir áætlun, samkvæmt ársreikningi fyrirtækisins.

Þar segir að aukningu í tekjum megi rekja til vörugjalda, aukinna flutninga og skipa- og hafnarþjónustu og vegna stærri skipa sem komu til hafnar, einkum skemmtiferðaskipa.

Gísli Gíslason, hafnarstjóri Faxaflóahafna, segir í ársskýrslu fyrirtækisins að stór verkefni séu fram undan sem komi til með að styrkja möguleika Faxaflóahafna og tækifæri í flutningum.

„Þær breytingar sem við sjáum að eiga munu sér stað allt umhverfis landið kalla á að við séum reiðubúin til þess að sinna hlutverki okkar þannig að sem best gagnist. Það er því sama hvert litið er, verkefnin og tækifærin eru fyrir hendi, en kúnstin er að stíga réttu skrefin á réttum tíma,“ segir Gísli.