Flytja inn flughermi fyrir Airbus-þyrlur

Hópur íslenskra fjárfesta sem stendur á bak við Mid Atlantic Sim Center ehf. hefur keypt flughermi fyrir Airbus AS350-þyrlur. Fyrirtækið ætlar að opna alþjóðlega þjálfunarmiðstöð hér á landi en flughermirinn verður sá fyrsti sinnar tegundar í Evrópu.

„Viðræður við fyrirtæki sem reka þessar þyrlur víðs vegar um heim eru þegar farnar af stað,“ segir Halldór Þorkelsson, framkvæmdastjóri fyrirtækisins.

Mid Atlantic Sim Center hefur gert samstarfsamning við spænska fyrirtækið Indra sem framleiðir flugherminn. Áform fyrirtækisins gera ráð fyrir að þjálfunarmiðstöðin verði opnuð á fyrri hluta 2016. Ljóst er að verkefnið hleypur á hundruðum milljóna króna en Halldór vill á þessu stigi ekki fara nánar út í heildarkostnaðinn.

„Þetta er umtalsverð fjárfesting og þess vegna höfum við unnið töluvert lengi að þessu. Þetta er engu að síður á byrjunarstigi.“

Að sögn Halldórs er einungis til einn flughermir fyrir AS350-þyrlur í heiminum. Hann er í Texas í Bandaríkjunum og ekki sömu kostum búinn og sá sem er væntanlegur hingað til lands.

„Við sáum því tækifæri á þessum markaði og erum að reyna að hreyfa okkur eins hratt og við getum. Þetta er álitlegt verkefni ef allt gengur eftir í gjaldeyrisskapandi atvinnustarfsemi á Íslandi,“ segir Halldór. Hann reiknar með að þorri viðskiptavina fyrirtækisins komi frá Evrópu en gerir einnig ráð fyrir fyrirtækjum frá Kanada og austurströnd Bandaríkjanna.

Halldór segir fyrirtækið eiga í viðræðum um húsnæði undir starfsemina.

„Við erum ekki í neinni stöðu til að gefa það upp enn þá en ég get sagt að við erum að horfa til staðsetningar á Reykjavíkursvæðinu.“

Fyrirtækið hefur einnig gert samning við Indra sem gerir ráð fyrir öðrum flughermi í þjálfunarmiðstöðinni. Sá er fyrir þyrlur af gerðinni Airbus AS355 en enginn slíkur hermir er til í heiminum.

„Það eru ekki til nauðsynleg grunngögn til að setja slíkt tæki saman en við höfum hug á því að koma að slíku þróunarverkefni sem vonandi yrði að flughermi í okkar aðstöðu.“