Íbúðaverð er tekið að lækka

Íbúðaverð er tekið að lækka, sé miðað við vísitölu íbúðaverðs á höfuðborgarsvæðinu. Vísitalan hefur nú lækkað tvo mánuði í röð, í fyrsta sinn frá því í desember 2010. Einnig var lækkun vísitölunnar í síðasta mánuði sú mesta frá því í desember 2010, eða 0,8 prósent.

Þetta kemur fram í Hagsjá Hagfræðideildar Landsbankans. Þar segir að lækkunin undanfarna tvo mánuði sé nær eingöngu tilkomin vegna lækkana á verði sérbýlis, en sérbýli hefur lækkað í verði um alls 4,3 prósent síðan í apríl. Engu að síður hækkaði íbúðaverð verulega þegar horft er á fyrri helming ársins í heild sinni. Verðið var 6,8 prósentum hærra í lok júní en fyrir ári.