Þriðja Boot Camp-stöðin opnuð erlendis

Þriðja Boot Camp-stöðin erlendis var opnuð í Kristiansand í Noregi nú í ágúst. Fyrir eru tvær í Danmörku, önnur í Vejle og hin í Kaupmannahöfn.

„Það hefur gengið ótrúlega vel. Viðtökurnar eru mjög góðar,“ segir Arnaldur Birgir Konráðsson framkvæmdastjóri, sem er betur þekktur sem Biggi í Boot Camp.

„Stöðvarnar eru allar svipaðar að stærð eða um tvö til þrjú hundruð fermetrar. Þær eru að reka sig eins og við gerðum hér á landi þegar við fórum fyrst af stað á um 200 til 250 kúnna grundvelli.“

Birgir bendir á að það kosti ekki mikið að hefja rekstur á Boot Camp stöð. „Konseptið byggist á því að byrja smátt. Þú getur byrjað hvar sem er, þetta snýst um að finna sér húsnæði og byggja svo ofan á það. Það þarf ekki að eyða miklum fjármunum í tæki og tól.“ Stöðvarnar eru reknar á grundvelli einkaleyfissamninga en Birgir og aðrir stofnendur Boot Camp eiga einkaleyfið undir heitinu Budz Boot Camp.

„Næstu skref eru í rauninni þau að við höfum sett okkur að gera vel það sem við erum að gera. Við viljum ekki vaða áfram, það er alltaf fullt sem maður getur gert betur.“