Bjó til jóladagatal úr klósettrúllu

Rán Flygenring, teiknari gerði óvenjulegt jóladagatal á dögunum. Jóladagatalið ber nafnið Ekki pissa í þig af spenningi og myndskreytti Rán rúllu af klósettpappír.

„Þetta er sem sagt dagatal þar sem maður rífur eitt snifsi af á dag. Þetta virkar eins og venjulegt dagatal en er vonandi líka svona sparnaðarráð í desember. Á aðfangadag getur maður svo alveg sleppt sér og notað alla rúlluna,“ segir Rán.

„Á hverju snifsi er smá heilræði eða jólateikning. Smá svona stemningsvekjandi,“ segir hún en dagatalið er líka hugsað sem jólaskraut fyrir baðherbergið.

Dagatalinu er einnig ætlað að vekja fólk til umhugsunar um pappírssóun enda á aðeins rífa í burtu eitt snifsi á dag, líkt og að opna einn glugga á dag á hefðbundnari jóladagatölum.

Jóladagatalið er ekki í framleiðslu enda um tækifærisgjöf af hálfu Ránar að ræða. „Mér var boðið í mat til vina minna og við vorum ekki beðin um að koma með neitt. Þá ákvað ég að koma með dagatalið sem gjöf,“ segir Rán.

Hvað framtíðina varðar þá útilokar hún ekki frekari framleiðslu á dagatalinu. „Ef fólk er æst þá er ég alveg að hugsa um að splæsa í fleiri og athuga framtíðarmöguleika á framleiðslu.“