Stefán Darri líklega úr leik í vetur

Stefán Darri Þórsson, leikmaður Fram í Olísdeild karla, hefur líklega spilað sinn síðasta leik í vetur eftir því sem fram kemur á heimasíðu félagsins.

Stefán Darri braut ristarbein í nóvember en var byrjaður að spila á ný. Í leik Fram gegn HK í vikunni gaf beinið sig svo á nýjan leik og þarf hann því að fara í aðgerð þar sem brotið verður skrúfað saman.

Þetta er einn eitt áfallið fyrir Stefán Darra og leikmannahóp Fram, sem hefur orðiði fyrir þó nokkrum skakkaföllum á tímabilinu.

HK vann umræddan leik heldur óvænt en það var aðeins þriðji sigur liðsins á tímabilinu. Fram er í áttunda sæti deildarinnar með þrettán stig, einu meira en Stjarnan.