Veðið vegna hlutabréfakaupa Skúla í Kaupþingi „bara smotterí”

Skúli Þorvaldsson, eigandi félagsins Holt Investment, gaf símaskýrslu fyrir dómi í dag í markaðsmisnotkunarmáli Kaupþings. Nokkrir fyrrverandi stjórnendur og starfsmenn bankans eru ákærðir fyrir markaðsmisnotkun og umboðssvik vegna hlutabréfakaupa Holt í bankanum, þeirra á meðal eru Hreiðar Már Sigurðsson, Sigurður Einarsson og Magnús Guðmundsson.

Samkvæmt ákæru sérstaks saksóknara fékk félagið þrjú lán frá Kaupþingi á árinu 2008 til að kaupa rúmlega 25 milljón hluti í bankanum. Lánin námu samtals rúmlega 18 milljörðum króna og átti félagið um 3,5% í Kaupþingi eftir viðskiptin.

Bað Skúla um að gerast hluthafi og sagðist lána honum fyrir kaupunum

Björn Þorvaldsson, saksóknari, spurði Skúla hvernig kaup Holt Investment í Kaupþingi hefðu komið til.

„Magnús [Guðmundsson] hringdi í mig á sínum tíma í byrjun febrúar 2008 og vildi fá mig sem hluthafa inn í Kaupþing. Þetta var náttúrulega umtalsverð upphæð og stór hluti en hann sagði að þeir væru tilbúnir til að lána fyrir kaupunum. Á móti átti ég svo að leggja fram viðbótartryggingu sem voru bréf mín í Exista upp á tæpan milljarð,” sagði Skúli.

Hann sagði að Magnús hefði sagt við sig að stjórnendur bankans vildu fá hann sem hluthafa en engin nöfn hefðu verið nefnd í því samhengi. Saksóknari spurði þá hvort hann sjálfur hefði verið í einhverjum samskiptum við Hreiðar Már, Sigurð Einarsson eða Ingólf Helgason og svaraði Skúli því til að hann hefði aldrei talað við þá.

Skúli gat litlu svarað um á hvaða verði hlutabréfin hefðu verið keypt, hver hefði heimilað lánveitinguna eða hvort hann þekkti tryggingu á endurgreiðslu lánanna.

Þá kvaðst Skúli ekki hafa vitað að Exista-bréf hans hefðu ekki verið tekin að veði fyrr en nokkrum mánuðum eftir að hann hafði lagt þau fram í febrúar 2008. Hann hefði skilið það sem svo að það veð væri bankans frá fyrsta degi auk þess sem bankinn var með veð í hlutabréfum Holt í Kaupþingi.

Einn milljarður á móti 16-17 milljörðum

Í símtali sem hlerað var við rannsókn málsins vorið 2010 og spilað var fyrir dómi í dag ræðir einn ákærðu í málinu, Bjarki Diego, framkvæmdastjóri útlána hjá Kaupþingi, við Rúnar Magna Jónsson, undirmann sinn, um viðskipti Holt og veðið í Exista-bréfunum.

Í símtalinu segir Rúnar Magni bréfin „bara smotterí, einhver milljarður [...] á móti sko 16-17 milljörðum. [...] Þetta er bara til málamynda [...]”

Rúnar Magni bar vitni í málinu í dag og beðinn um að útskýra þessi orð sín sagði hann að í hlutfalli við lánin hefði milljarður verið lág upphæð sem veð.