Íslenska liðið betra í síðari hálfleik og uppskar sigur

Ísland vann Líbanon, 96-75, á æfingarmóti í Póllandi í dag en Líbanon var 40-34 yfir í hálfleik.

Íslenska liðið var lengi af stað en vann að lokum þægilegan sigur. Martin Hermannsson var atkvæðamestur í liði Íslands með 24 stig og fimm fráköst.

Haukur Helgi gerði 23 stig og tók sex fráköst. Logi Gunnarsson gerði 15 stig fyrir íslenska liðið.

Lokaleikur íslenska liðsins er gegn Belgíu á morgun en liðið tekur þátt á mótinu í undirbúningi sínum fyrir Eurobasket mótið sem fram fer í Þýskalandi í september.