Carlos Sainz og Daniil Kvyat fljótastir á æfingum

Carlos Sainz á Toro Rosso var fljótastur á fyrri æfingu dagsins. Daniil Kvyat varð annar á Red Bull á fyrri æfingunni og fljótastur á seinni æfingunni.

Mikil bleyta var á brautinni og það hafði áhrif á akstur á æfingunni. Einungis 12 af 20 ökumönnum settu tíma. Allir ökumenn fóru þó út á brautina til að finna rétta uppstillingu fyrir bíla sína.

Williams mennirnir Felipe Massa og Valtteri Bottas lentu báðir í darraðardans þegar þeir fóru út á milliregndekkjum, fyrstir allra.

Lotus liðið ók ekki mikið á æfingunni enda ekki mikið af varahlutum til á lagernum.

Kvyat var 0,023 sekúndum á undan Nico Rosberg á Mercedes á seinni æfingunni. Lewis Hamilton varð þriðji, einnig á Mercedes og Daniel Ricciardo á Red Bull varð fjórði.

Flestir ökumenn héldu sig inn í bílskúr þegar fór að rigna aftur á seinni æfingunni. Bottas fór til dæmis ekkert út á brautina á seinni æfingunni.

Svar við stóru spurningu helgarinnar fæst ekki fyrr en í fyrramálið á þriðju æfingunni sem á að fara fram í þurru samkvæmt veðurspá. Sú spurning er hvort martraðir Mercedes liðsins frá því í Singapúr haldi áfram eða ekki. Liðið átti sína verstu keppni síðan nýju vélareglurnar tóku gildi í ársbyrjun 2014.

Þriðja æfingin fer fram klukkan 3:00 í nótt og er í beinni á Stöð 2 Sport. Bein útsending frá tímatökunni hefst svo klukkan 5:50 í fyrramálið, einnig á Stöð 2 Sport. Bein útsending frá keppninni hefst svo klukkan 4:30 á sunnudagsmorgun, auðvitað á Stöð 2 Sport.

Hér fyrir neðan má finna öll helstu úrslit helgarinnar. þau uppfærast eftir því sem helgin líður.