Þetta eru niðurstöður RÚV nefndarinnar

Rekstur RÚV ohf. hefur ekki verið sjálfbær frá stofnun félagsins árið 2007. Þetta eru niðurstöður skýrslu um reksturinn sem skilað var til mennta- og menningarmálaráðherra í dag.

Í niðurstöðukafla skýrslunnar segir að gjöld hafi verið meiri en tekjur á tímabilinu í heild og að hallarekstur hafi verið fjármagnaður af ríkinu, með lántöku og frestu afborgana lána.

Kostnaðurinn vandamálið

Nefndin sem vann skýrsluna kemst að þeirri niðurstöðu að rekstrarvandi RÚV sé fyrst og fremst á kostnaðarhliðinni. Frá stofnun hefur rekstrarkostnaður verið að jafnaði 5,4 milljarðar á ári á föstu verðlagi. Taprekstur var á fjórum af þeim átta árum sem félagið hefur verið starfandi.

Í skýrslunni er einnig vísað til þess að innheimt útvarpsgjalds hefur aldrei runnið óskipt til RÚV en að heildartekjur á íbúa séu talsvert meiri en meðaltal systurstofnana í Norður-Evrópu og Kanada.

Mikil skuldsetning

Sérstaklega er fjallað um fjögurra milljarða skuldinbingu RÚV vegna fimmtán ára samnings við Vodafone um stafrænt dreifikerfi, sem byggir á úreldri tækni.

„Á árunum 2012-2014 jukust vaxtaberandi skuldir RÚV hlutfallslega mest, eða um eina og hálfa milljón króna á dag að jafnaði,“ segir í skýrslunni. Nefndin bendir einnig á að fjármagnsgjöld RÚV hafi undanfarin ár verið um sex prósent af heildargjöldum félagsins.

Fólk hættir að horfa á sjónvarp

Nefndin fjallar einnig um breytta neytendahegðun sem felur í sér mikinn samdrátt í áhrofi á hefðbundan sjónvarpsdagskrá. Þetta á sérstaklega við hjá ungu fólki. Telur nefndin að mikilvægt sé að endurskoða þjónustuhlutaverk RÚV í ljósi þeirrar þróunar.

„Heildaráhorf 18-49 ára hefur dregist saman um tæp 36% í heild og 47% á línulega dagskrá,“ segir í skýringarmynd sem fylgir skýrslunni. Minni munur er hins vegar á útvarpshlustun á tímabilinu.

Að mati nefndarinnar standa eftir nokkur mikilvæg álitamál:

• Er ohf. rekstrarformið heppilegt fyrir starfsemi RÚV þar sem reynslan sýnir að félagið er ekki rekið með takmarkaðri ábyrgð þegar ávallt er gert ráð fyrir að ríkissjóður rétti af fjárhag félagsins?
• Stjórnvöld hefðu getað lokið ljósleiðaravæðingu landsins fyrir sömu fjárhæð og fjárhæð Vodafonesamningsins.
• Á RÚV að vera á auglýsingamarkaði?
• Er RÚV best til þess fallið að ná fram markmiðum ríkisins sem snúa að íslenskri menningu, tungu og lýðræðisumræðu?
• Innan við 60% af heildargjöldum RÚV fer í beinan kostnað við innlenda dagskrá.
• Er hægt að fá betri nýtingu á fjárveitingar ríkissjóðs?