Kendall Jenner með bleikt hár í Vogue

Síðustu tólf ár hefur Vogue valið tíu hönnuði sem þeim finnst bera af, til þess að taka þátt í CFDA/Vogue Fashion Fund verkefninu. Þar fá hönnuðirnir tilsögn og aðstoð frá fagfólki bæði í hönnun og viðskiptum við að þróa og framleiða línuna sína. 

Í lokin stendur einn uppi sem sigurvegari og fær viðkomandi háa peningaupphæð í verðlaun. Meðal þeirra sem hafa sigrað þessa keppni síðustu ár eru Alexander Wang, Proenza Schouler, Tabitha Simmons og Prabal Gurung.

Til að kynna þessa tíu hönnuði sem taka þátt, var gerður myndaþáttur fyrir Vogue, þar sem fyrirsætan Kendall Jenner sat fyrir ásamt Nick Jonas, Gigi Hadid og Jaden Smith. Myndirnar tók Annie Leibowitz.

Í þættinum sést hversu ólíkir hönnuðirnir eru, og bregður Kendall sér í ólík hlutverk á hverri mynd. Á einni þeirra skartar hún bleiku hári og þykir hún minna á No Doubt söngkonuna Gwen Stefani. 

Sigurvegarinn verður svo tilkynntur þann 2. nóvember.