Milljónir séð franskt tónlistarmyndband með Íslandi í aðalhlutverki

Er ekki lengur hægt að taka upp tónlistarmyndband án þess að gera það á Suðurlandi?

Frönsku rappbræðurnir í PNL gefa fullt tilefni til að spyrja þessarar spurningar í kjölfar útgáfu myndbands þeirra við lagið Oh Lala sem þykir um margt líkt nýju myndbandi poppgoðsins Justins Bieber.

Rappararnir í PNL, sem stendur fyrir Peace and Lovés eða „Friður og Peningar,“ eru orðnir töluvert númer í heimalandinu en á dögunum fór plata þeirra í efsta sætið á franska iTunes-vinsældalistanum.

Vinsælir rapparana má að hluta að rekja til sérvisku þeirra en þeir hafa þvertekið að ræða við fjölmiðlamenn og það hvarflar ekki að þeim að semja við útgáfufyrirtæki.

Myndband þeirra bræðra við lagið Oh Lala rataði á netið fyrir um tveimur vikum síðan og hefur það fengið rúmlega 4,5 milljón áhorf þegar þetta er skrifað. Myndböndin þeirra eru alla jafna mjög vinsæl og segir The Guardian að eftir þeim sé iðullega beðið með mikilli eftirvæntingu.  

Í myndbandinu fara þeir bræður mikinn í Reynistaðafjöru, við flugvélina á Sólheimasandi og við Jökulsárlón – stef sem áhugafólk um popptónlist hefur ekki farið varhluta af síðastliðna viku.

Myndbandið þykir þannig um margt svipa til myndbands Justins Biebers við lagið I’ll Show You en popparinn gekk þó skrefinu lengra en þeir frönsku og synti í Jökulsárlóni.

Rapptvíeykið gaf sitt myndband út rúmlega viku á undan popparanum og því verður ekki annað sagt en að líkindin séu einskær tilviljun.

Myndbandið við Oh Lala má sjá hér að ofan en eftirfarandi er myndband popparans Biebers.