Barnabækur, fatnaður og heyrnartól í jólapökkunum í ár

Um 20 próset aukning var í sölu fatnaðar í síðustu viku miðað við á sama tíma í fyrra. Bókaverslun fer einnig vel af stað og merkjanleg aukning er í sölu barnabóka. Þetta kemur fram í úttekt Rannsóknarseturs verslunarinnar á tímabilinu 30. nóvember til 6. desember.

Í tilkynningu frá Samtökum verslunar og þjónustu segir að góða sölu á fatnaði megi rekja til þess að verslanir eru í auknum mæli farnar að bjóða fatnað með 15 prósent afslætti til að mæta væntanlegum verðbreytingum sem verða vegna niðurfellingar tolla um áramótin.

Sala á spjaldtölvum, sem hafa notið vinsælda undanfarin ár, virðist þó hafa dregist saman milli ára. Merki séu þannig um að neytendur kjósi nú fremur snjallsíma með stóra skjái enn spjaldtölvur. Sala á snjallsímum hefur verið góð á árinu en það virðist þó draga úr henni nú í aðdraganda jólanna segir í tilkynningunni. Nokkur aukning hefur hins vegar verið í sölu á ferðahátölurum og heyrnartólum.

Black Friday dró úr sölu vikunnar

Í tilkynningunni kemur einnig fram að kaupmenn hafi almennt fundið fyrir minni sölu í síðustu viku miðað við vikuna þar á undan. Ástæðuna telja þeir helst vera vegna mikils fannfergis og hvassviðris, auk þess sem margir neytendur hafi nýtt sér tilboð sem kennd voru við „Black Friday“.

Úttektin var unnin fyrir Samtök verslunar og þjónustu og henni er ætlað að gefa samanburðarhæfa mynd af verslun á Íslandi milli ára. Leitað var til valinna verslana sem hver um sig mat heildarsölu tímabilsins, þær breytur sem höfðu áhrif á hana og báru síðan saman við söluna sömu viku síðasta árs. Ef undanfarin vika er borin saman við sama tímabil fyrir ári síðan má greina nokkurn samdrátt í sölu búsáhalda og heimilisbúnaðar.

Sala raftækja, sem hefur aukist mikið það sem af er ári, var nokkuð meiri í síðustu viku en á sama tíma í fyrra. en aukningin var þó töluvert minni en hún hefur verið undanfarið. Í fyrra hófst nýtt kortatímabil 5. desember sem hafði jákvæð áhrif á verslun þá í byrjun mánaðarins. Í ár hefst kortatímabil mánaðarins þann 12. Desember og segja Samtök verlsunar og þjónustu því viðbúið að verslunin taki mið af því og færist aftar í mánuðinn.