Mörg gengislánamál enn óleyst

„Þetta virðist því miður staðfesta það sem við höfum haldið fram, að nýju bankarnir hafa í of miklum mæli látið dómstólunum eftir að ráðstafa þeim afslætti sem þeir fengu af gengislánunum þegar þau voru færð úr þrotabúum gömlu bankanna,“ segir Ólafur Stephensen, framkvæmdastjóri Félags atvinnurekenda. Ný könnun sem félagið lét Gallup vinna fyrir sig sýnir að enn er óleyst úr ágreiningi margra fyrirtækja við lánastofnanir vegna gengislána.

Könnunin náði til 455 fyrirtækja. Af þeim eru rúm 27 prósent með lán í erlendri mynt eða höfðu verið með slíkt lán undanfarin sjö ár. Af stærri fyrirtækjunum, þ.e. með veltu yfir 1.000 milljónir, voru 57 prósent með gengislán eða höfðu verið með slíkt lán.

Af fyrirtækjum sem höfðu tekið lán í erlendri mynt höfðu 48,6 prósent átt í ágreiningi við fjármálastofnun vegna lánsins. Þegar þau fyrirtæki voru spurð hvort leyst hefði verið úr ágreiningnum, svöruðu rúmlega 40 prósent að hann hefði verið leystur að fullu, um 35 prósent að úr honum hefði verið leyst að hluta og rúmlega 23 prósent að ágreiningurinn væri óleystur.

„Óleystur ágreiningur vegna gengislána er meinsemd í íslensku viðskiptalífi sem stendur í vegi fyrir því að mörg fyrirtæki nái að blómstra, vaxa og fjárfesta. Allt þetta ferli hefur tekið allt of mikinn tíma og orku frá allt of mörgum fyrir­tækjum og dregið úr þeim kraft til vaxtar og fjárfestinga,“ segir Ólafur Stephensen.

Þeir sem höfðu fengið leyst úr ágreiningi sínum við banka að öllu leyti eða að hluta til voru spurðir hversu ánægðir þeir væru með úrlausnina. Rúmlega 28% sögðust óánægðir, 38% ánægðir og 33 prósent hvorki né.

Könnunin var gerð dagana 2. nóvember til 1. desember. Hluti svarenda fékk könnunina beint á neti, en hringt var í nokkra þátttakendur og þeim boðið að velja á milli þess að svara á neti eða í síma. Tekið var úrtak fyrirtækja með fjóra starfsmenn eða fleiri, handahófsvalið úr fyrirtækjaskrá og Viðhorfahópi Gallup. Gagnaöflun stóð yfir þar til 450-500 svörum var náð.