Færa tilbúinn veitingastað um sex metra og fá að opna

Veitingastaðurinn Nam mun opna á Laugavegi snemma á nýju ári eftir að hafa staðið í stappi við Reykjavíkurborg frá því í sumar. Staðurinn stóð klár strax í júlí en mátti ekki opna vegna skilyrðis í veitingaleyfi rýmisins sem Nam leigir. Þar segir að veitingastaður í rýminu megi ekki sjást frá götunni.  

„Það kom lausn í byrjun desember með borginni,“ segir Emil Helgi Lárusson, annar eigenda staðarins. „Það fól hreinlega í sér að við þurftum að taka niður staðinn sem við vorum búin að setja upp og færa hann sex metrum innar. Við þurftum að fjárfesta í það einhverjum milljónum en þetta skiptir víst öllu máli.“

Sjá einnig: Eigendur Nam íhuga að fela staðinn við Laugaveg

Skilyrðið er sett vegna ákvæða í Aðalskipulagi Reykjavíkurborgar 2010-2030 um að veitingarekstur megi ekki fara yfir þrjátíu prósent hlutfall af rýmum í borginni á miðborgarsvæði. Málið vakti talsverða athygli fjölmiðla í sumar en Emil og félagar voru skiljanlega svekktir yfir því að geta ekki opnað fullbúin veitingastað vegna ákvæðis í veitingaleyfinu sem þeir höfðu ekki tekið eftir.

„Við höfum aldrei verið neitt sérstaklega fúlir, það er ekki þannig,“ segir Emil. „Það er ekki eins og einhver hafi viljað okkur eitthvað illt. Ég held að því sé best lýst með því að segja að við séum hissa. Þessar kvaðir sem komu upp og okkur var ekki kunnugt um í byrjun, við höfum ekki heimildir um annað en að það sé enginn annar staður á Íslandi með þessar kvaðir. Mistökin okkar fólust þannig í því að gera ekki ráð fyrir kvöðum sem enginn annar hefur.“

Sjá einnig: Slást um veitingastaðakvótann á Laugavegi

Þegar eigendur Nam ákváðu í byrjun mánaðar að verða við óskum borgarinnar um að færa staðinn nokkra metra („Við bara ákváðum að það væru betri möguleikar á að láta þetta ganga með staðinn opinn frekar en lokaðan,“ segir Emil,“) tók við kapphlaup við tímann um að reyna að ná að opna á aðventunni. Það getur þó reynst þrautin þyngri að fá iðnaðarmenn til starfa á þessum árstíma og þó framkvæmdir séu langt komnar, verður ekki opið á Þorláksmessu líkt og til stóð.

„Það lítur út fyrir að við séum að tapa því stríði en við ætlum að opna hress á nýju ári,“ segir Emil. „Fyrst að þetta var svona erfið fæðing, hlýtur þetta að verða alveg frábær staður.“

Hann segir gesti og gangandi velkomna í heimsókn til að skoða húsnæðið á morgun og að til standi að gefa heita súpu ef það verður kalt úti.