Sögur af illu fólki

Daglega eru sagðar fréttir af vondu fólki, illu fólki sem hikar ekki við að ráðast að þeim sem eiga erfitt með að verja sig. Fólkið gerir ótrúlegustu hluti til að hagnast á vondri stöðu annarra. Fréttir eru sagðar af fólki sem jafnvel leggst svo lágt að vekja innihaldslausar vonir hjá fárveikum eða leggur sig hreinlega fram um að kvelja saklaust fólk.

Fjölmiðlar eru iðnir við að segja frá, fletta ofan af og benda á fólk, mest karla, sem fer um í leit að varnarlausu og mikið veiku fólki. Í von um að geta talað sig inn á viðkomandi og vakið falsvonir. Allt í þeim tilgangi að geta féflett fólkið. Siðleysið virðist algjört.

Í Fréttablaðinu í gær var átakanleg frásögn konu, dóttur manns sem lést af veikindum sínum. Fanti hafði tekist að kveikja vonir hjá þeim deyjandi, með lygum og þvættingi. Þeim dauðvona var vorkunn. Varnir hans og dómgreind réðu ekki við ágang fantsins. Hann lét tilleiðast og fór með hrappinum til Havaí. „Hann var fárveikur þegar hann fór út til Havaí og í engu standi til ferðalaga. Hann stóð ekki í lappirnar […] Mér telst til að meðferðin hafi kostað um milljón krónur.“ Kostnaðurinn varð hins vegar mun meiri því sá veiki lenti á spítala og reikningurinn vegna þess var um tvær milljónir.

Til að kóróna vitleysuna tókst hinum illa manni að rugla þann veika svo að hann keypti golfbíl fyrir milligöngu svikahrappsins, viss um að innan skamms yrði hann farinn að leika golf á ný. Auðvitað varð ekki af því. „Hann ríghélt í vonina og reyndi öll ráð,“ sagði dóttir hans. Inn á þetta spila hinir illu.

Stöð 2 sagði frá hrikalegu einelti í Setbergsskóla í Hafnarfirði. Sá sem fjöldinn lagðist á kom fram og sagði frá hluta rauna sinna. Hann undraðist hversu lengi vondir krakkar fengu að fara sínu fram án afskipta eða aðkomu skólastjóra eða kennara. Þó öllum væri ljóst hvað var verið að gera var ekki brugðist við. Börn við Setbergsskóla fengu að gera líf drengs að hreinu helvíti. Sem betur reyndist sá sem fyrir varð sterkur í angist sinni, hann lét ekki verða af því að svipta sig lífi, þrátt fyrir vilja til þess. Hagur hans hefur batnað. Nýr kennari hefur haft góð áhrif. Það segir um leið að annað starfsfólk Setbergsskóla lét eineltið, árásirnar, viðgangast.

„Þau spörkuðu í mig, kýldu og hrintu mér. Mér var hótað með hníf og þau ætluðu að grýta mig með grjóti,“ sagði drengurinn í viðtali við Stöð 2 og móðir hans sagði: „Þetta voru allir í árganginum, tveir bekkir, sem fóru á eftir honum og tóku af honum myndbönd og sögðust ætla að opna Facebook-síðu til að allur heimurinn gæti séð hvað hann væri ljótur.“ Í lýsingum þeirra kemur fram ótrúleg mannvonska fjöldans gegn einum varnarlausum pilti.

Þessi dæmi, þessar sögur af illu fólki eru hreint ótrúlegar. Mannskepnan getur verið grimm og miskunnarlaus. Ábyrgðin er ekki bara gerendanna. Hún er allra nema þolendanna. Illskan er látin viðgangast.