Ný Icesave-ógn vomir yfir: Hundruð milljarða í húfi fyrir Ísland

EFTA-dómstóllinn mun taka afstöðu til þriggja spurninga varðandi það hvort sú tilhögun sem gripið var til varðandi samkomulag um Icesave standist EES-samninginn.

Breski lögfræðingurinn Tim Ward hefur verið ráðinn til að fara með mál Tryggingarsjóðs innstæðueigenda og fjárfesta (TIF), en hann var í lögmannateyminu sem sá um Icesave-málið á sínum tíma.

Erfitt er að henda reiður á því hve háar fjárhæðir felast í ýtrustu kröfum Breta og Hollendinga. TIF sendi frá sér tilkynningu í fyrra þar sem því var lýst yfir að kröfurnar næmu um 556 milljörðum króna. Þar af nam krafa Hollendinga 103,6 milljörðum króna. Þeir hafa nú fallið frá höfuðstólskröfu sinni, en krefjast enn vaxta og kostnaðar.

Gunnar Viðar, lögmaður TIF, segir ljóst að krafan sé hærri.

„Á þeim tíma voru vextir og kostnaður talin taka kröfuna upp í um 1.000 milljarða króna.“

Hæstiréttur Íslands staðfesti á dögunum úrskurð Héraðsdóms Reykjavíkur um að Bretum og Hollendingum yrði leyft að leggja þrjár spurningar fyrir EFTA-dómstólinn.

Spurningarnar lúta að því hvort það samræmist EES-samningnum að skuldbindingar innstæðutryggingarsjóðs takmarkist við eignirnar á þeim tíma sem innstæður verða ótiltæk innlán þótt eignirnar dugi ekki til lágmarkstryggingar, hvort heimilt sé að stofna nýja deild um innlánstryggingarsjóð eins og gert var hér á landi og hvort það hafi verið heimilt að takmarka útgreiðslu úr sjóðnum við það sem tiltækt er í honum og krefjast þess að fallið verði frá frekari kröfum.

Guðrún Þorleifsdóttir, formaður stjórnar TIF, segir að alltaf sé þó óvissa þegar dómsmál er höfðað. Ljóst sé að Icesave sé hvergi lokið.

„Nei, þetta er náttúrulega klárlega partur af Icesave-málinu.“

Hún segist þó tiltölulega bjartsýn á niðurstöðuna.

„Það er þó alltaf ákveðin óvissa þegar búið er að höfða mál og gildandi réttur er kannski hvergi skráður hvað þessi atriði varðar nákvæmlega.“

Verði úrskurður EFTA-dómstólsins Bretum og Hollendingum í hag þurfa þeir að reka mál gegn íslenskum stjórnvöldum fyrir Héraðsdómi Reykjavíkur.