Þegar Presley bað Nixon um að fá að gerast leynilögga

Einn af furðulegri fundum sem áttu sér stað í Hvíta húsinu í Bandaríkjunum á síðustu öld var þegar tónlistarmaðurinn Elvis Presley hitti Richard Nixon, þáverandi Bandaríkjaforseta, 21. desember árið 1970. Er nú væntanleg kvikmynd um þennan fund þar sem Michael Shannon leikur Presley og Kevin Spacey leikur Nixon. Stiklu úr myndinni má sjá neðst í greininni.

Presley átti frumkvæðið að fundinum en hann hafði sent forsetanum handskrifað bréf þar sem hann óskaði eftir því að fá að hitta Nixon og vildi fá að gerast leynilögreglufulltrúi innan fíkniefnadeildar bandarísku alríkislögreglunnar.

Priscilla Presley, sem var gift Elvis á árunum 1967 til 1973, sagði í æviminningum sínum að Presley hefði sé þessa stöðu sem einhverskonar alræðisvald, sem fengist með því að hljóta einkennismerki alríkislögreglumanns. Sagði hún Presley hafa trúað því að með slíku merki gæti hann á löglegan hátt ferðast á milli landa með skotvopn og eiturlyf að eigin vali.

Þeir sem vilja fræðast nánar um þennan fund geta farið inn á síðu þjóðskjalasafns Bandaríkjanna hér og lesið meðal annars bréf Presley til Nixon og þakkarbréf forsetans til söngvarans.