Efnaminni fjölskyldur festast á leigumarkaðnum vegna þess hve erfitt er að komast í gegnum greiðslumat

Ingibjörg Þórðardóttir, formaður Félags fasteignasala, telur að endurskoða þurfi lög um greiðslumat og framfærslu svo auðveldara verði fyrir fjölskyldur, ekki síst þær sem eru barnmargar, að eignast þak yfir höfuðið.

„Það er orðið afar erfitt fyrir fjölskyldur að komast í gegnum greiðslumat, ég tala nú ekki um ef fjölskyldur eru mannmargar, þá er þetta bara orðinn ótrúlega erfiður hjalli. Mér finnst að það þurfi að endurskoða þetta að einhverju leyti og gera fólki kleift að búa í eigin húsnæði. Fólk þarf auðvitað að standast greiðslumat og það er skiljanlegt en fjölskyldur eru misjafnar,“ sagði Ingibjörg í Bítinu á Bylgjunni í morgun.

Hún tók dæmi um fjölskyldu þar sem væru hjón með þrjú börn á skólaaldri. Foreldrarnir þyrftu meðal annars að greiða fyrir skólamáltíðir og frístundaheimili og samkvæmt framfærsluviðmiðum velferðarráðuneytisins væri kostnaðurinn þá kominn upp í 640 þúsund krónur.  

„Þá á eftir að reka fasteignina og borga af henni og þá erum við farin að tala um útborguð laun kannski upp undir 900 þúsund miðað við það hvað fjölskyldan þarf að kaupa stórt og hvað hentar henni.“

Að mati Ingibjargar verða langtímaáhrif þess að erfitt sé fyrir fólk að komast í gegnum greiðslumat þau að þeir sem hafi minna á milli handanna festist á leigumarkaðnum.

„Það er verið að búa til leigufjölskyldur sem hafa enga aðra möguleika en að vera á leigumarkaði. Við skulum líka athuga það að afborgun af láni sem er 20-25 milljónir þá er það afborgun kannski í kringum 120 þúsund og það er kannski rösklega áætlað miðað við verðtryggð lán og svo getur það verið meira ef þú ert með óverðtryggt lán. En það er líka erfiðara að komast í gegnum greiðslumat með óverðtryggt lán.“

Þannig að kerfið er að ýta fólki út í verðtrygginguna?

„Já, í raun og veru myndi ég segja það, með þessu.“

Viðtalið við Ingibjörgu úr Bítinu í morgun má hlusta á í heild sinni í spilaranum hér að ofan.