Svíar kaupa Zymetech á milljarð

Sænska líftæknifyrirtækið Enzymatica AB hefur keypt 99,5 prósent hlutafjár íslenska líftæknifyrirtækinu Zymetech ehf.

Kaupverð er greitt með 21,9 milljón hlutum í Enzymatica og áskriftarréttindum upp á 4 milljónir hluta til viðbótar, sem leiðir til þess að hluthafar Zymetech verða hluthafar í Enzymatica. Markaðsvirði 21,9 milljón hluta í sænska félaginu er metinn á rúman milljarð króna en Enzymatica er skráð á sænska First North markaðnum.

Zymetech hefur unnið að rannsóknum og þróun afurða úr hafinu. Fyrirtækið hefur meðal annars einkaleyfi á Penzyme® sem unnið er úr ensímum í Norður-Atlantshafsþorski og nýtt hefur verið til framleiðslu á húð- og lækningavörum á borð við Penzim® og PreCold® auk þess að vera grunnefni í margþættu rannsóknar- og þróunarstarfi á undanförnum árum.

Í tilkynningu frá Zymetech kemur fram að fyrirtækin hafa verið í viðskiptasambandi á liðnum árum og kaupin miða m.a. að því að skapa sterkari stöðu til að sækja fram með einkaleyfisvarða hagnýtingu á sjávarensímum í meðferðartilgangi. Gert er ráð fyrir að því umfangsmikla vísindastarfi sem unnið hefur verið á Íslandi verði haldið áfram með óbreyttum hætti. Kaupverð er greitt með hlutabréfum og áskriftarréttindum í Enzymatica, sem leiðir til þess að hluthafar Zymetech verða hluthafar í Enzymatica.

Hjá Zymetech vinna tíu manns og munu þeir m.a. starfa við þá öflugu rannsóknar- og þróunarmiðstöð sem Enzymatica ráðgerir að starfrækja hér á landi auk þess sem framleiðsla á ensímum og efnablöndum verður áfram á Íslandi að því er segir í tilkynningunni. Heildarfjöldi starfsmanna Enzymatica verður um 25 fyrst um sinn en kaupunum, ásamt hlutafjáraukningu sem fylgir í kjölfarið, er ætlað að leggja grunn að kröftugri markaðssókn og verulegri aukningu í alþjóðlegum umsvifum.

„Kaupin á Zymetech eru stór áfangi í fyrirhugaðri sókn Enzymatica á alþjóðamarkað“ segir Fredrik Lindberg, forstjóri Enzymatica. „Við öðlumst einkaleyfisvarinn rétt til að markaðssetja ColdZyme® um alla Evrópu og í u.þ.b. tíu öðrum löndum. Til viðbótar mun vísindaþekkingin innan rannsóknar- og þróunarteymis Zymetech verða frekari vöruþróun og stækkunaráformum okkar mikil lyftistöng“.

„Sem hluthafi og fulltrúi stærstu hluthafa í Zymetech með 73.5% af hlutafjáreign fagna ég þessum viðskiptum og sömuleiðis metnaðarfullri vaxtastefnu Enzymatica. Við hyggjumst verða lykilhluthafar í Enzymatica til langs tíma litið“, segir Guðmundur Pálmason, stjórnarformaður Zymetech í tilkynningu.