Dró Palin sundur og saman í háði

Tina Fey sneri aftur í Saturday Night Live í gærkvöldi þar sem hún brá sér í líki fyrrverandi varaforsetaframbjóðandans Söruh Palin.

Í atriði, sem sjá má hér að neðan, gerði hún óspart grín að ræðu sem Palin hélt á stuðningsmannafundi auðkýfingsins Donalds Trumps í Iowa á dögunum en hann sækist eftir því að verða næsti forseti Bandaríkjanna.

Sjá einnig: Palin styður framboð Trump

Ræða Palin vakti mikla athygli, ekki síst fyrir áhugavert tungutak Alaskabúans sem og mikla innlifun. Hafa netverjar jafnvel haldið því fram að Palin hafi verið drukkin þegar hún steig í pontu hjá Trump.

Enginn fótur virðist þó hafa verið þeim vangaveltum. Frammistöðu Tinu Fey í líki Palin má sjá hér að neðan.