Skrifað undir samning án ákvæðis um SALEK

„Samband íslenskra sveitarfélaga féll frá því að SALEK-samkomulagið væri hluti af þessum kjarasamningi þannig að á grundvelli þess gátum við skrifað undir,“ segir Vilhjálmur Birgisson, formaður Verkalýðsfélags Akraness (VLFA). Skrifað var undir nýjan kjarasamning félagsins og sveitarfélaganna í húsnæði ríkissáttasemjara í Reykjavík í dagslok á miðvikudag. Kynning á samningnum hefst í þessari viku.

Nýr samningur gildir til 31. mars 2019 og er í öllum meginatriðum eins og aðrir samningar sem sveitarfélögin hafa gert eftir að samkomulag náðist á grunni SALEK í október, utan að Akraneskaupstaður tryggir að hann gildi frá 1. maí 2015, auk sérákvæða um fjögurra prósenta hækkun til handa ófaglærðum starfsmönnum á leikskólum.

„Þetta er bara eitt skref af mörgum í að vinna í því að samningsrétturinn verði ekki skertur hjá íslensku launafólki,“ segir Vilhjálmur.

Í veginum var ekki annað en ákvæðið um SALEK sem sveitarfélögin höfðu viljað hafa tengt nýjum samningi. „Það var enginn ágreiningur um það. Okkar aðalmál var að SALEK-samkomulagið yrði ekki fylgiskjal með kjarasamningnum sem hefði gert það að ígildi kjarasamnings,“ segir Vilhjálmur.

Í kjölfarið var bókað hjá ríkissáttasemjara að hvað þetta mál varðaði væri frekari málarekstur fyrir félagsdómi eða dómstólum úr sögunni. „Við erum fyrsta stéttarfélagið sem undirritar slíkan samning við sveitarfélögin,“ segir Vilhjálmur og kveðst nokkuð ánægður með gerðan samning.

Vilhjálmur segir miklu máli hafa skipt sá stuðningur sem félagsmenn VLFA hafi sýnt baráttunni gegn SALEK-ákvæðinu. „Menn sýndu því skilning að þarna var ekki karpað um krónur og aura heldur framtíðarsamningsfrelsi okkar." 

Lokaspretturinn

Við taka aðrar viðræður hjá samninganefnd sveitarfélaganna, en meðal þeirra sem enn er ósamið við eru tónlistarkennarar, hjúkrunarfræðingar, verkfræðingar og fleiri stéttir.

Flestir eru bjartsýnir á að samningar náist þótt einhverjum þyki nokkur dráttur orinn á. Þannig eru sagðar rólegar viðræður í gangi hjá félagi slökkviliðs og sjúkraflutningamanna. „Ég reikna með að við klárum snemma í febrúar,“ segir Valdimar Leó Friðriksson, framkvæmdastjóri félagsins.

Kristín Á. Guðmundsdóttir, formaður Sjúkraliðafélags Íslands, telur viðræður við sveitarfélögin hins vegar hafa gengið hægt þó hist hafi verið nokkrum sinnum. Á næsta fundi, sem boðað hafi verið til eftir helgina segir hún samninganefnd sveitarfélaganna hafa boðað framlagningu tillögu sem tekin verði til skoðunar.