Kvika keypti jeppann hans Skúla

Skúli Mogensen, fjárfestir og stjórnarmaður í Kviku banka, sem áður hét MP banki, seldi Mercedes Benz M-class bifreið sína til bankans árið 2011. Þetta staðfesta gögn úr ökutækjaskrá yfir feril ökutækisins. 

Skúli átti bifreiðina á tímabilinu 28. ágúst 2009 til 16. desember árið 2011, þegar Kvika keypti af honum bílinn, samkvæmt ökutækjaskrá. Á síðasta ári var bíllinn svo seldur út úr bankanum en síðan þá hefur hann verið seldur aftur og inn í eignarhaldsfélag í Mosfellsbæ.

Milljóna jeppi

Um er að ræða Mercedes Benz ML 63 AMG jeppabifreið sem í dag er metin á bilinu 6,5 til 10 milljónir króna, miðað við upplýsingar um sambærilega bíla á bílasölum landsins. Bíllinn er fyrst skráður 1. janúar árið 2007 en fyrsti eigandi kaupir hann í lok maí árið 2008. 

Skúli keypti hlut í bankanum í apríl árið 2011 og liðu átta mánuðir þangað til kaupsamningur var gerður við bankann um að hann myndi kaupa af honum Benzinn. Í millitíðinni skipti MP banki um forstjóra og Sigurður Atli Jónsson, núverandi bankastjóri Kviku, tók við.

Bankastjórinn vill skoða málið

Sigurður Atli, forstjóri bankans, vildi ekkert tjá sig um málið og sagðist vilja skoða það áður en hann tjáir sig. Hann vildi heldur ekki svara spurningum fréttamanns um hvort bankinn hafi keypt aðrar eignir stjórnarmanna eða hluthafa bankans. 

Þá ítrekaði hann að hann vildi skoða málið áður en hann tjáði sig við fréttamann þegar heimildir fréttastofu um að hann sem bankastjóri MP banka hafi haft bílinn til afnota voru bornar undir hann. „Þú hlýtur að skilja það,“ sagði hann.

Heldur að bankastjórinn hafi fengið bílinn

Skúli staðfesti hins vegar að hann hafi selt bílinn og sagði að það hafi verið gert með samþykki stjórn bankans.

„Ég held að bankastjóri bankans hafi fengið afnot af þessum bíl í kjölfarið. Þetta fór fram í gegnum bílasölu, fengum mat á bílinn og það bara selt á markaðsvirði eins og það lá fyrir þá,“ segir hann.

„Svo það sé nú alveg skýrt, ég skil nú ekki alveg hvað þú ert að grafa eða fiska eftir, en þetta var allt uppi á borði. Það var lagt fyrir mat á bílnum, það er að segja verðmat frá óháðum aðila, og allt gert á yfirborðinu í þeim efnum,“ segir Skúli.

Hann segist aðspurður ekki vita til eða muna eftir að hafa selt aðrar eignir til bankans.