365 og Vodafone ná samkomulagi um „pay per view“ á íþróttaviðburðum

Vodafone og 365 gengu í dag frá samingi sem gerir Vodafone það mögulegt að bjóða til sölu á einstökum íþróttaviðburðum (Pay Per View) á spænska fótboltanum, Meistaradeildinni og Evrópudeildinni í knattspyrnu ásamt Meistaradeildinni í hestaíþróttum. Þetta kemur fram í tilkynningu frá 365.

„Við höfum unnið að því talsverðan tíma að bjóða upp á „pay per view“. Við gerðum tilraun með það ásamt Vodafone í nóvember og Símanum um jólin,“ segir Sævar Freyr Þráinsson, forstjóri 365, í samtali við Vísi um samninginn sem undirritaður var í dag. 365 verður nokkurskonar heildsali og selur Vodafone staka leiki en síðarnefnda fyrirtækið ákveður síðan verðið á leikjunum.

„Við teljum þetta virkilega góða viðbót fyrir markaðinn. Við munum áfram bjóða upp á sportpakkana okkar þar sem fólk borgar í raun hundrað krónur fyrir hvern leik en fyrir þá sem horfa á færri leiki, kannski tvo þrjá í mánuði, þá er þetta góð viðbót,“ segir Sævar Freyr.

Vodafone býður upp á þessa þjónustu strax á morgun í Meistaradeildinni í knattspyrnu.

365 er útgefandi Vísis.