Landsbankinn óskar eftir því að Ríkisendurskoðun skoði söluna á Borgun

Landsbankinn hefur óskað eftir því að Ríkisendurskoðun skoði sölu bankans á eignarhlut sínum í Borgun. Bankinn segir að engir annarlegir hvatar hafi legið að baki ákvörðun bankans að selja hlut sinni í Borgun á þann hátt sem gert var.

Þetta kemur fram í svari bankans við spurningum frá Bankasýslu ríkisins þar sem óskað var eftir upplýsingum um sölumeðferð Landsbankans á eignarhlut sínum í Borgun.

Sjá einnig: Fjármálaráðherra segir stöðu Borgunarmálsins mjög alvarlega

Ríkisendurskoðun hefur nú þegar til skoðunar aðkomu sína að málinu en stofnunin er kjörinn endurskoðandi bankans. Mun Ríkisendurskoðun taka ákvörðun um hvort að stofnunin skoði sölu Landsbankans á eignarhlut sínum í Borgun þegar fyrir liggja viðbrögð annarra aðila sem málið hafa til skoðunar.

Töldu Valitor vera eina íslenska kortafélagið sem ætti tilkall til ávinnings vegnar nýtingar valréttar

Í svari bankans kemur fram að Landsbankinn hafði upplýsingar um valrétti en hafði engar upplýsingar um að Borgun hf. gæti notið hagsbóta af yfirtöku á Visa Europe.

Bankinn bjó ekki yfir upplýsingum um hvort eða hvenær Visa Inc. myndi neyta kaupréttarins eða Visa Europe söluréttarins enda lá það ekki fyrir fyrr en 2. nóvember 2015 þegar upplýst var um viðskiptin.

Sjá einnig: Segir stjórnmálamenn ekki beita þrýstingi

Það var hins vegar skilningur Landsbankans að vegna sögulegra tengsla Valitor við Visa Europe og yfirburða markaðshlutdeildar félagsins í útgáfu Visa-korta myndi Valitor, eitt íslenskra kortafélaga, eiga tilkall til slíks ávinnings í kjölfar hugsanlegrar nýtingar valréttarins ef til hans kæmi.

Í svarinu er áréttað að Landsbankinn hafi ekki haft vitneskju um að Borgun kynni að eiga rétt til sambærilegra greiðslna við nýtingu valréttarins. Af þeirri ástæðu var ekki samið um það sérstaklega þegar eignarhlutur bankans í Borgun var seldur.

Sjá einnig: Landsbankinn vissi að Visa gæti tekið yfir Visa Europe

Ástæðan fyrir þessum skilningi Landsbankans var jafnframt sú að þjónusta sem Landsbankinn hafði keypt af Borgun tengdist Mastercard-kortum en ekki VISA-kortaviðskiptum. Fyrir vikið þótti ekki tilefni til þess að ætla að Borgun ætti rétt til greiðslna vegna nýtingar valréttarins. Eftir því sem næst verður komist var vitneskja um annað ekki á almennu vitorði.

Dregur lærdóm og breytir stefnu sinni

Í svörum bankans er athygli vakin á að engin almenn og ófrávíkjanleg krafa hafi verið gerð af hálfu löggjafans eða eftirlitsyfirvalda til þess að fara í almennt söluútboð, auglýsa eignir á markaði eða hafa sölumeðferð með öðrum hætti opna.

Til marks um þetta beindi Samkeppniseftirlitið því til viðskiptabanka í eigu ríkisins að leitast við að hafa ferlið opið og gagnsætt eftir því sem kostur væri.

Landsbankinn hefur dregið lærdóm af þeirri umræðu sem orðið hefur í kjölfar sölu bankans á hlut sínum í Borgun og breytt stefnu sinni og verklagi til samræmis við hana segir í svörum bankans.

Skoða má svar Landsbankans við erindi Bankasýslu ríkisins hér.