Sjáðu síðasta bardaga hjá andstæðingi Conors

Næsti andstæðingur Conor McGregor, Nate Diaz, barðist síðast þann 19. desember. Viku eftir að Conor rotaði Jose Aldo.

Þá barðist Diaz við Michael Johnson í frábærum bardaga sem var valinn bardagi kvöldsins. Sama kvöld náði Rafael dos Anjos að vinna Donald „Cowboy“ Cerrone auðveldlega.

Sjá einnig: Conor mætir Nate Diaz

Conor átti upprunalega að keppa við Dos Anjos og Cerrone vildi svo fá bardaginn við Conor er Dos Anjos dró sig úr bardaganum í gær vegna meiðsla.

Diaz kom mörgum á óvart með góðri frammistöðu gegn Johnson. Bardaginn fór allar þrjár loturnar og allir dómarar voru sammála um að Diaz hefði unnið. Eftir rólega fyrstu lotu kviknaði á Diaz.

Sjá einnig: Svona leit fóturinn á Dos Anjos út í gær

Diaz hefur lítið keppt síðustu ár. Þetta var eini bardaginn hans í fyrra og árið 2014 keppti hann líka aðeins einu sinni. Það var í desember og þá tapaði hann einmitt fyrir áðurnefndum Dos Anjos.

Bardagi Diaz og Dos Anjos fór fullar þrjár lotur og Dos Anjos vann á stigum hjá öllum dómurum. Bardagi McGregor og Diaz er skipulagður í fimm lotur.

Sjá má bardagann í heild sinni hér að ofan. Pétur Marinó Jónsson lýsir.

Við vekjum líka athygli á viðtalinu við Diaz eftir bardagann þar sem hann skorar Conor á hólm.