Dýna úr íslenskri ull

Hönnunarteymið RoShamBo á Seyðisfirði kynnti dýnu úr íslenskri ull á nýliðnum HönnunarMars. Dýnan er fyllt með mislitri ull sem annars er lítið notuð. Þá hefur teymið einnig hannað trébekk undir dýnuna.

„Við erum myndlistarmenn, handverksmenn og hönnuðir í einum kokteil, eins konar þríhöfða hönnunarteymi sem unnið hefur saman frá 2012. Verkefnalistinn er afar fjölbreyttur en öll tengjast verkefnin þó menningu og hönnun og því að skoða hvaða tækifæri liggja ónýtt í kringum okkur,“ útskýrir Þórunn Eymundardóttir sem ásamt Hönnu Christel Sigurkarlsdóttur og Litten Nyström skipar hönnunarteymið RoShamBo á Seyðisfirði.

RoShamBo kynnti á HönnunarMars dýnu sem fyllt er með íslenskri ull. Þórunn segir teymið hafa unnið að þróun dýnunnar í þrjú ár og nú er hún komin á markað. Þær annast framleiðsluna sjálfar á verkstæði sínu á Seyðisfirði.

„Dýnan Ró er nýjasta verkefnið okkar og það stærsta. Hún er sprottin upp úr vangaveltum um það hráefni sem er í kringum okkur. Við könnuðum hvort við gætum gert dýnu úr íslenskri ull og notum mislitu ullina sem fyllingu. Áklæðið er 100% ullaráklæði frá danska fyrirtækin Kvadrat. Þetta er hágæðaáklæði sem bæði er ofið og þæft og er það þétt að það mátti sleppa öllum millilögum úr bómull, sem annars er yfirleitt notuð í dýnur en með því hefðu eigin­leikar ullarinnar tapast,“ útskýrir Þórunn. 

„Dýnan er afar falleg og dásamlegt að sofa á henni en það er löng hefð fyrir ullardýnum í Skandinavíu. Ullardýnur eru meðal annars tilvaldar fyrir þá sem vilja huga að heilsunni og náttúrunni,“ segir Þórunn. 

Dýnuna má nota á marga vegu. Sem yfirdýnu ofan á aðra dýnu, eða beint ofan á þéttan rimlabotn eða ofinn taubotn. Þórunn segir dýnuna vel nýtast inni í stofu, samanbrotna á gólfi eða á legubekk.

„Við höfum einnig hannað legubekk undir dýnuna sem hægt er að panta hjá okkur. Dýnuna er hægt að panta í öllum hefðbundnum rúmstærðum og einnig er hægt að sérpanta aðrar stærðir,“ segir Þórunn.

Nánar má forvitnast um dýnuna Ró á síðunni www.ro-selection.com og undir roselection á Facebook.