Mugison og lífið í Kassanum

Nokkuð er síðan að Mugison hefur látið á sér kræla í höfuðborginni en nú ætlar hann svo sannarlega að bæta upp fyrir fjarveruna. Í kvöld heldur hann fyrstu tónleikana í seríu sem fer fram í Kassanum í Þjóðleikhúsinu en þar mun hann koma fram öll fimmtu-, föstu, laugar- og sunnudagskvöld út næsta mánuðinn.

„Þetta er smá tilraun. Þetta er 130 sæta salur sem tryggir að ég er í góðri nánd við áhorfendur. Þetta er virkilega flottur staður. Ég ætla að hafa þessi sjóf á ensku og spila alltaf í klukkutíma. Þá meina ég að ég ætla að tala á milli laga á ensku þó svo að ég flytji auðvitað einhver lög á íslensku. Ég ætla að prufa þetta í nokkrar vikur en ég mun alveg halda þessu áfram ef það er markaður fyrir þessu.“

Sleppur við að þurfa fara frá fjölskyldunni

Mugison segir það vera orðið nokkuð algengt að íslenskir tónlistarmenn tali við gesti á ensku þar sem fjöldi ferðamanna sé orðinn slíkur að eðlilegra sé að tala tungumál sem flestir gestir skilja. En er hentugt að vera alltaf á sama staðnum?

„Hugmyndin er frá systur minni sem vinnur í túrista-bransanum. Það togast á í manni að fara út að túra, því manni langar náttúrulega bara alltaf að vera spila. En það er svo leiðinlegt að þurfa fara frá fjölskyldunni. Hún benti mér á að spila bara fyrir túristana. Hún benti mér á að það væri þá grundvallar regla að vera á sama stað á sama tíma til þess að fólk gæti gengið að þessu vísu. Ég vil bara prufa það til að sjá hvort það sé nægilega margir sem hafi áhuga á svona löguðu.“

Sleppur við að þurfa að róta

Þetta er líka hentugt að því leyti að svona sleppur Mugison við allt það umstang sem tengist því að þurfa flytja hljóðfæri og annað á milli staða. Hann getur einfaldlega mætt í vinnuna á hverjum vinnudegi eins og flestir geri, þó svo að vinnuvika tónlistarmannsins líti öðruvísi út en margra annarra.

„Ég hef litið á það þannig að ég spili ókeypis en fái borgað fyrir vesenið. Að sitja í rútu og þurfa svo að róta öllu draslinu inn og gera klárt.

Mugison kemur einn fram á tónleikunum en hefur sett upp mismunandi leikstöðvar á sviðinu.

„Ég er með aðalleikstöð þar sem ég er með gítar í magnara að spila blús. Svo er ég með fortíðarþrá, þá sest í gamlan stól annars staðar með dempað ljós og kósí og spila akkústík. Svo fer ég inn í framtíðina og Rúna tekur dúett með mér á kassagítarinn. Þá varpa ég henni á kassagítarinn þannig að það er eins og hún sé inn í honum.“

Ný plata í vinnslu

Mugison hefur ekki gefið út nýja plötu síðan árið 2011. Góðu fréttirnar eru að næsta plata hans er við það að verða tilbúin til útgáfu.

„Ég held að ég þurfi að fara drekka eitthvað nýtt te sem heitir sjálfstraust og klára þetta bara. Lögin eru til í einhverri mynd. Planið er að klára hana með fram þessu verkefni. Ef ég næ að vinna eitthvað að þessu næstu mánuði þá ætti hún að verða tilbúin í vetur. Ég datt smá út og missti sjálfstraustið og þurfti að henda fullt. Núna er ég orðinn ógeðslega ánægður með þetta.“

Tónleikarnir í Kassanum í kvöld hefjast, eins og allir aðrir tónleikar í röðinni, klukkan 21:30.