Óvænt tap West Ham í Slóveníu

West Ham United tapaði óvænt fyrir slóvenska liðinu Domzale á útivelli í kvöld. Lokatölur 2-1, Domzale í vil.

Þetta var fyrri leikur liðanna í 3. umferð forkeppni Evrópudeildarinnar en seinni leikurinn fer fram eftir viku á Ólympíuvellinum í London, nýjum heimavelli West Ham.

Slaven Bilic, knattspyrnustjóri West Ham, tefldi fram mjög sterku liði í leiknum í kvöld en það dugði ekki til.

Matic Crnic kom Domzale yfir á 11. mínútu en Mark Noble jafnaði metin úr vítaspyrnu sjö mínútum síðar. Það var svo Crnic sem tryggði Domzale sigurinn þegar hann skoraði sitt annað mark á 49. mínútu.

Hamrarnir þurfa að gera betur í seinni leiknum en útivallarmarkið sem Noble skoraði gæti reynst þeim dýrmætt.