Vilja fá Niasse vegna meiðsla Kolbeins

Tyrkneska blaðið fotoMac slær því upp á forsíðu sinni í dag að Galatasaray hafi áhuga á að fá sóknarmanninn Oumar Niasse að láni frá Everton í Englandi.

Kolbeinn Sigþórsson var lánaður til tyrkneska félagsins í sumar frá Nantes í Frakklandi en hefur ekkert náð að spila með liðinu, né heldur íslenska landsliðinu, vegna meiðsla.

Sjá einnig: Kolbeinn fór í aðgerð á hné

Enn eru nokkrar vikur í að Kolbeinn verði leikfær á ný en samkvæmt áðurnefndri frétt vilja forráðamenn Galatasaray styrkja framlínu liðsins enn frekar.

Niasse er 26 ára og kom til Everton í febrúar. Hann hefur síðan þá komið við sögu í fimm deildarleikjum en ekki náð að skora enn.

Sjá einnig: Everton gerir eldsnöggan Senegala að þriðja dýrasta leikmanni félagsins

Niasse virðist enn fremur ekki vera í myndinni hjá Ronald Koeman, stjóra Everton, en eini leikur hans til þessa á tímabilinu var með U-23 liði Everton.

Niasse er 26 ára og kom til Everton frá Lokomotiv Moskvu, þar sem hann skoraði tólf mörk í 28 leikjum.