Úrskurður Kjararáðs hafði áhrif á ákvörðun um óbreytta vexti

Órói á vinnumarkaði í kjölfar úrskurðar Kjararáðs er á meðal þeirra óvissuþátta sem höfðu hvað mest áhrif á þá ákvörðun Seðlabankans að halda stýrivöxtum óbreyttum.

Aðalahagfræðingur Seðlabankans segir að úrskurður Kjararáðs um launahækkanir alþingismanna sé úr takti við þróun á almennum vinnumarkaði.

Í yfirlýsingu peningastefnunefndar er vísað til óvissuþátta sem höfðu áhrif á ákvörðun um að halda styrivöxtum óbreyttum.

„Má þar sérstaklega nefna óvissu um stefnuna í ríkisfjármálum, en aðhald hennar hefur slaknað nokkuð undanfarin tvö ár og óljóst er á þessu stigi hver efnahagsstefna næstu ríkisstjórnar verður. Þá gætir óróa á vinnumarkaði, ekki síst í kjölfar nýlegs úrskurðar um hækkun launa þjóðkjörinna fulltrúa,“ segir í yfirlýsingu nefndarinnar. 

„Í ljósi umræðu um kosningaloforð er ástæða til að hafa áhyggjur af því að það verði enn meiri slökun á aðhaldi ríkisfjármál og það er því áhættuþáttur númer eitt. Svo er orðin mikil ólga á vinnumarkaði í kjölfar nýlegs úrskurðar Kjararáðs. Í því samhengi sem þessi úrskurður kemur þá finnst mér þetta ákaflega óheppilegt og ég velti því fyrir mér hvort ekki hefði verið réttara að taka þessi ákvörðun, eins og ég held að lögin segi, að það verði að horfa á stöðuna á vinnumarkaði. Hætta er sú að þetta leiði til mikillar ólgu og við erum þegar farin að sjá það,“ segir Þórarinn G. Pétursson aðalhagfræðingur Seðlabankans og nefndarmaður í peningastefnunefnd. 

Þetta er rétt munað hjá Þórarni. Í 2. mgr. 8. gr. laga um kjararáð segir: „Kjararáð skal ætíð taka tillit til almennrar þróunar kjaramála á vinnumarkaði.“

Síðasti úrskurður ráðsins felur í sér 44 prósenta launahækkun fyrir alþingismenn en með þessum úrskurði ráðsins var þingafararkaup hækkað í 1.101.194 krónur á mánuði.

„Eftir því sem við höfum skoðað þessar tölur hér þá sýnist okkur þetta vera umfram það (innsk. blm. hækkun á almennum vinnumarkaði) Jafnvel þótt litið sé aftur til ársins 2006,“ segir Már Guðmundsson seðlabankastjóri.