Munum flugeldana Kristín Þorsteinsdóttir skrifar 26. nóvember 2016 07:00 Ekki er sjálfgefið að skipulag björgunarstarfs hjá herlausri smáþjóð í risastóru harðbýlu landi sé í lagi. Við eigum því láni að fagna að fjölmennar björgunarsveitir sjálfboðaliða annast öryggi okkar – og gera það prýðilega. Sveitirnar vinna þrekvirki á þrekvirki ofan og spara ríkinu stórfé í hverju útkalli. Björgunarsveitirnar eru ein helsta skrautfjöður Íslands. Þær vinna verk sem hermenn og launaðar sveitir atvinnumanna sinna í nálægum löndum. Íslenskar björgunarsveitir eru umfjöllunarefni í nýjum útvarpsþætti BBC. Þar er ekki farið leynt með aðdáunina á ungu björgunarfólki, sem sjálft aflar fjár til starfsins. Hátt í 500 björgunarsveitarmenn leituðu rjúpnaskyttu á Austfjörðum um síðustu helgi. Allt fór vel í það skiptið. Björgunarfólkinu varð ekki meint af og veiðimaðurinn fannst heill á húfi en kaldur og hrakinn eftir að hafa grafið sig í snjóskafl tvær langar nætur rammvilltur og farsíma- og staðsetningartækjalaus. Fjölmiðlar greindu samviskusamlega frá gangi leitarinnar og þjóðin fékk gleðitíðindin, eins og vera ber, þegar skyttan fannst. Við urðum vitni að hetjudáðum björgunarsveitanna, sem reiða sig á eigin fjáröflun með flugeldasölu og styrkjum frá fólki og fyrirtækjum. Þær þurfa að kaupa tól og tæki og halda starfinu gangandi. Fjölmiðlum er skylt að segja frá sorgum þeirra og sigrum. Það styður vöxt og viðgang sveitanna að fólkið í landinu fái að vita hvað þær gera. Því skaut skökku við þegar rjúpnaskyttan sem heimt var úr helju ásakaði fjölmiðla um ónærgætni. Slíkri ásökun er hvergi hægt að finna stað. Þegar þyrla Gæslunnar lenti og hann steig út á þyrlupallinn við sjúkrahúsið í Reykjavík var sjálfsagt og eðlilegt að taka myndir. Þær sýndu ekkert niðurlægjandi og ekkert ósiðlegt heldur gleðistund, sem deilt var með þjóðinni. Enginn var neyddur í viðtal. Þvert á móti fékk maðurinn sem bjargað var tækifæri til að þakka fyrir sig, sem hann gerði kurteislega. Sýndur var endir sigurgöngu, sem að vísu kostaði tugi milljóna og mikla fyrirhöfn. En enginn sá eftir peningunum. Enginn taldi eftir sér fyrirhöfnina. Sérkennilegt var, að Landspítalinn skyldi taka undir gagnrýni rjúpnaskyttunnar. Fáir kunna betur að nýta sér fjölmiðla til að vekja athygli á bágri aðstöðu sinni en einmitt Landspítalinn. Fjölmiðlar bregðast við þeirra góða málstað. En stundum þykir stjórnmálamönnunum, sem ábyrgð bera á ríkiskassanum, nóg um og fjölmiðlarnir full leiðitamir. Fjölgun ferðamanna að vetrarlagi hefur aukið álag á björgunarsveitir. Því má gera ráð fyrir, að hugmyndir um atvinnumannasveitir fái byr undir báða vængi. Það er góðra gjalda vert. En slíkar ráðagerðir verða að taka mið af því að varðveita og efla það góða starf sem fram fer. Sjálfboðaliðar, sem fá grunnþjálfun í heilbrigðu frístundastarfi barna og unglinga, verða áfram að vera í forystu. Sjálfboðaliðarnir rísa vel undir ábyrgðinni og þau vilja bera hana. Munum flugeldasöluna um áramótin. Þessi grein birtist fyrst í Fréttablaðinu. Viltu birta grein á Vísi? Sendu okkur póst. Senda grein Kristín Þorsteinsdóttir Mest lesið Hver á að fá súrefnisgrímuna fyrst? Davíð Bergmann. Skoðun Elsku Íslendingar, styðjum saman Grindavík Dagmar Valsdóttir Skoðun Þeir sem verja stórútgerðina – og heimsvaldastefnuna Karl Héðinn Kristjánsson Skoðun Betri vegur til Þorlákshafnar er samkeppnismál Ólafur Stephensen Skoðun Óvirðing við lýðræðislegar hefðir, gegn stjórnarskrá, trúnaðarbrot gagnvart kjósendum Arnar Þór Jónsson Skoðun Gervigreindin beisluð Hanna Kristín Skaftadóttir,Helga Sigrún Harðardóttir Skoðun Lík brennd í Grafarvogi Diljá Mist Einarsdóttir Skoðun Orðhengilsháttur og lygar Elín Erna Steinarsdóttir Skoðun Baráttan um kjör eldra fólks Jónína Björk Óskarsdóttir Skoðun Svigrúm Eydísar á fölskum grunni Kristinn Karl Brynjarsson Skoðun
Ekki er sjálfgefið að skipulag björgunarstarfs hjá herlausri smáþjóð í risastóru harðbýlu landi sé í lagi. Við eigum því láni að fagna að fjölmennar björgunarsveitir sjálfboðaliða annast öryggi okkar – og gera það prýðilega. Sveitirnar vinna þrekvirki á þrekvirki ofan og spara ríkinu stórfé í hverju útkalli. Björgunarsveitirnar eru ein helsta skrautfjöður Íslands. Þær vinna verk sem hermenn og launaðar sveitir atvinnumanna sinna í nálægum löndum. Íslenskar björgunarsveitir eru umfjöllunarefni í nýjum útvarpsþætti BBC. Þar er ekki farið leynt með aðdáunina á ungu björgunarfólki, sem sjálft aflar fjár til starfsins. Hátt í 500 björgunarsveitarmenn leituðu rjúpnaskyttu á Austfjörðum um síðustu helgi. Allt fór vel í það skiptið. Björgunarfólkinu varð ekki meint af og veiðimaðurinn fannst heill á húfi en kaldur og hrakinn eftir að hafa grafið sig í snjóskafl tvær langar nætur rammvilltur og farsíma- og staðsetningartækjalaus. Fjölmiðlar greindu samviskusamlega frá gangi leitarinnar og þjóðin fékk gleðitíðindin, eins og vera ber, þegar skyttan fannst. Við urðum vitni að hetjudáðum björgunarsveitanna, sem reiða sig á eigin fjáröflun með flugeldasölu og styrkjum frá fólki og fyrirtækjum. Þær þurfa að kaupa tól og tæki og halda starfinu gangandi. Fjölmiðlum er skylt að segja frá sorgum þeirra og sigrum. Það styður vöxt og viðgang sveitanna að fólkið í landinu fái að vita hvað þær gera. Því skaut skökku við þegar rjúpnaskyttan sem heimt var úr helju ásakaði fjölmiðla um ónærgætni. Slíkri ásökun er hvergi hægt að finna stað. Þegar þyrla Gæslunnar lenti og hann steig út á þyrlupallinn við sjúkrahúsið í Reykjavík var sjálfsagt og eðlilegt að taka myndir. Þær sýndu ekkert niðurlægjandi og ekkert ósiðlegt heldur gleðistund, sem deilt var með þjóðinni. Enginn var neyddur í viðtal. Þvert á móti fékk maðurinn sem bjargað var tækifæri til að þakka fyrir sig, sem hann gerði kurteislega. Sýndur var endir sigurgöngu, sem að vísu kostaði tugi milljóna og mikla fyrirhöfn. En enginn sá eftir peningunum. Enginn taldi eftir sér fyrirhöfnina. Sérkennilegt var, að Landspítalinn skyldi taka undir gagnrýni rjúpnaskyttunnar. Fáir kunna betur að nýta sér fjölmiðla til að vekja athygli á bágri aðstöðu sinni en einmitt Landspítalinn. Fjölmiðlar bregðast við þeirra góða málstað. En stundum þykir stjórnmálamönnunum, sem ábyrgð bera á ríkiskassanum, nóg um og fjölmiðlarnir full leiðitamir. Fjölgun ferðamanna að vetrarlagi hefur aukið álag á björgunarsveitir. Því má gera ráð fyrir, að hugmyndir um atvinnumannasveitir fái byr undir báða vængi. Það er góðra gjalda vert. En slíkar ráðagerðir verða að taka mið af því að varðveita og efla það góða starf sem fram fer. Sjálfboðaliðar, sem fá grunnþjálfun í heilbrigðu frístundastarfi barna og unglinga, verða áfram að vera í forystu. Sjálfboðaliðarnir rísa vel undir ábyrgðinni og þau vilja bera hana. Munum flugeldasöluna um áramótin. Þessi grein birtist fyrst í Fréttablaðinu.
Óvirðing við lýðræðislegar hefðir, gegn stjórnarskrá, trúnaðarbrot gagnvart kjósendum Arnar Þór Jónsson Skoðun
Óvirðing við lýðræðislegar hefðir, gegn stjórnarskrá, trúnaðarbrot gagnvart kjósendum Arnar Þór Jónsson Skoðun