Stefán Hrafn nýr deildarstjóri samskiptadeildar Landspítala

Stefán Hrafn Hagalín er nýr deildarstjóri samskiptadeildar Landspítala. Hann tekur við starfinu af Guðnýju Helgu Herbertsdóttur 1. desember.

Stefán Hrafn er verkefnastjóri hjá Auðkenni í dag en hefur undanfarin þrjú ár verið deildarstjóri markaðsmála og mannauðs hjá Odda.

Þar áður stýrði hann markaðsmálum og almannatengslum í upplýsingatækni um fimmtán ára skeið, nánar tiltekið hjá Advania, Skýrr, Opnum kerfum og Teymi, Oracle á Íslandi.

Stefán Hrafn starfaði þar áður við fjölmiðla í liðlega áratug, meðal annars sem ritstjóri Helgarpóstsins og Tölvuheims, fréttastjóri Alþýðublaðsins og þáttastjórnandi hjá Bylgjunni og Stöð 2. Hann er giftur Valgerði Gunnarsdóttur, grafískum hönnuði hjá Pipar/TBWA. Þau eiga fimm börn á aldrinum 17-27 ára.

„Landspítali er lifandi og fjölbreyttur vinnustaður þar sem yfir 5.000 manns starfa í þverfaglegum teymum fjölmargra fagstétta. Framtíðarsýn Landspítala er ekki bara að vera háskólasjúkrahús í hæsta gæðaflokki, heldur að vera vinnustaður í fremstu röð. Mannauðurinn hjá spítalanum er ótrúlegur, stjórnendateymið metnaðarfullt og krafturinn í starfseminni einstakur. Það er spennandi viðfangsefni að axla þetta starf hjá þjóðarsjúkrahúsinu,“ er haft eftir Stefáni Hrafni í tilkynningu frá Landspítalanum.

Hlutverk samskiptadeildar Landspítala er að móta og innleiða stefnu um innri og ytri samskipti og skipuleggja virka upplýsingamiðlun um stefnu og starfsemi spítalans. Í verkahring deildarinnar eru meðal annars framleiðsla kynningarefnis, margvísleg útgáfa, samfélagsmiðlar og vefmál. Samskiptadeild sér einnig um almannatengsl og samskipti við fjölmiðla, ásamt því að hafa umsjón með stærri viðburðum.