Schumacher fjöl­skyldan stofnar góð­gerðar­sam­tök

Fjölskylda Michael Schumacher, sjöfalda heimsmeistarans í Formúlu 1, hefur sett á laggirnar góðgerðarsamtök í hans nafni. Samtökin bera heitið Keep Fighting á ensku eða Berjumst áfram á íslensku.

Nú eru liðin næstum tvö ár síðan Schumacher slasaðist illa í skiðaslysi. Hann var marga mánuði á spítala eftir slysið en dvelur nú á heimili sínu. Upplýsingar um ástand hans eru afar litlar og einungis veittar fólki í innsta hring.

Eiginkona Schumacher, Corrina segist vona að samtökin verði „hvetjandi fyrir aðra til að gefast aldrei upp.“

Umboðsmaður heimsmeistarans fyrrverandi, Sabina Kehm sagði: „Þetta er fyrsta skrefið í átt að samtökum sem geta gert góðverk í framtíðinni.“

„Markmið samtakanna er að dreifa þeim boðskap og þeirri trú að uppgjöf sé ekki möguleiki, skilaboðin tengjast ekki aðeins akstursíþróttum. Með stofnun samtakanna viljum við snúa skelfilegum atburði sem hefur áhrif á alla Schumacher fjölskylduna í eitthvað jákvætt,“ bætti Kehm við.

Kehm ítrekaði að engar upplýsingar yrðu veittar um ástand Schumacher.

„Heilsa Michael varðar ekki almenning og við munum því halda ástandi hans leyndu áfram. Það er að sumu leyti vegna þess að við viljum vernda nærumhverfi hans,“ hélt Kehm áfram.

Heimasíða samtakanna er: www.keepfighting.ms